জম্মু-কাশ্মীৰত প্রচণ্ড বৰষুণে বিপৰ্যয় সৃষ্টি কৰিছে। আজি ডোডা জিলাত মেঘ বিস্ফোৰণৰ ফলত ভয়ংকৰ ধ্বংসলীলা ঘটিছে। এই দুৰ্ঘটনাত তিনিজন লোকৰ মৃত্যু হৈছে আৰু ১৫টা ঘৰ ক্ষতিগ্রস্ত হৈছে। ক্ষতিগ্রস্ত অঞ্চলত বর্তমান উদ্ধাৰ অভিযান চলি আছে যদিও ভৌগোলিক দুৰ্গমতাৰ কাৰণে এই কাম কঠিন হৈ পৰিছে।
ক্ষতিগ্রস্ত অঞ্চলত ৰাজপথেদি যোৱা সম্ভৱ নহয়, আৰু তাত উপনীত হ’বলৈ ৪০-৫০ মিনিট খোজকাঢ়ি যাব লাগে। এই দুৰ্গমতাই উদ্ধাৰ অভিযানৰ প্ৰত্যাহ্বানক আৰু বৃদ্ধি কৰিছে। তিনি দিন ধৰি অবিৰাম বৰষুণৰ ফলত পৰিস্থিতি আৰু জটিল হৈ পৰিছে। কালি ৰাতি অত্যধিক বৰষুণৰ ফলত ডোডাৰ চাৰৱা আৰু মৰ্মত অঞ্চলত মেঘ বিস্ফোৰণৰ ঘটনা ঘটে। ইয়াৰ উপৰি তিনিখন ফুট ব্রিজ ক্ষতিগ্রস্ত হৈছে, আৰু চেনাব নদীৰ জলস্তৰ বিপদৰেখাৰ ওপৰত উঠিছে।
অবিৰাম বৰষুণ, ভূমিস্খলন আৰু শিল পৰাৰ ফলত জংগলগৱাৰ নালাৰ ওচৰত এন এইচ-২৪৪ (ডোডা-কিষ্টৱাৰ)ত যান-বাহন চলাচল সম্পূৰ্ণৰূপে বন্ধ হৈ পৰিছে, কিয়নো ৰাস্তাৰ এটা অংশ পানীত ভাহি গৈছে। জনসাধাৰণক ৰাস্তা পুনৰ্স্থাপন নোহোৱালৈকে এই পথত যাতায়াতৰ পৰা বিৰত থাকিবলৈ অনুৰোধ জনোৱা হৈছে।
জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই পৰিস্থিতিৰ প্ৰতি গুৰুত্ব দি পৰ্যালোচনা বৈঠকৰ আয়োজন কৰিছে। তেওঁ কৈছে যে পৰিস্থিতি অত্যন্ত গুৰুতৰ, আৰু তেওঁ নিজে পৰিস্থিতিৰ ওপৰত নজৰ ৰাখিছে। উমৰ আব্দুল্লাই শ্ৰীনগৰৰ পৰা পৰৱৰ্তী ফ্লাইটেৰে জম্মুলৈ যোৱাৰ কথা ঘোষণা কৰিছে, যাতে তেওঁ নিজে পৰিস্থিতিৰ তদাৰক কৰিব পাৰে। তেওঁ জিলা আয়ুক্তসকলক জৰুৰী পুনৰ্স্থাপন কাৰ্য আৰু অন্যান্য প্ৰয়োজনীয়তাৰ বাবে অতিৰিক্ত ধনৰাশিৰ ব্যৱস্থা কৰাৰ নিৰ্দেশ জাৰি কৰিছে।
প্রচণ্ড বৰষুণৰ পৰিপ্রেক্ষিতত জম্মু অঞ্চলৰ প্ৰশাসনে জৰুৰী পৰিস্থিতিৰ মোকাবিলাৰ বাবে হেল্পলাইন নম্বৰ জাৰি কৰিছে। জনসাধাৰণক নদীৰ পাৰ আৰু বানপানীৰ সম্ভাৱনা থকা অঞ্চলৰ পৰা দূৰত থাকিবলৈ কঠোৰভাৱে পৰামৰ্শ দিয়া হৈছে। বছন্তৰ, তৱী আৰু চেনাব নদীৰ জলস্তৰ বর্তমান সতৰ্কতাৰ স্তৰত আছে।
District wise Helpline numbers
For Emergency please contact the following numbers: https://t.co/an6QeFeZuE pic.twitter.com/SVLiiq8CiB
— Divisional Commissioner Jammu (@Divcomjammu) August 26, 2025
প্রতিকূল বতৰৰ কাৰণে মাতা বৈষ্ণোদেৱীৰ যাত্ৰা সাময়িকভাৱে বন্ধ কৰা হৈছে। ভাৰতীয় বতৰ বিজ্ঞান বিভাগে জম্মু অঞ্চলৰ বাবে আজি ৰেড সতৰ্কতা জাৰি কৰিছে, কিয়নো কিছুমান স্থানত অত্যধিক বৰষুণৰ সম্ভাৱনা আছে।