খানাপাৰাত অসম গ্ৰন্থমেলা-ত ১৪ দিনত ৭.৪০ কোটি টকাৰ গ্রন্থ বিক্রী

সাহিত্য–সংস্কৃতি, নাটক–ইতিহাসৰ এলানি বর্ণিল কার্যক্রমণিকাৰে আয়োজন কৰা ১৪ দিনীয়া অসম গ্রন্থমেলা, গুৱাহাটীৰ সফল সামৰণি ঘটাই নিজম পৰিল খানাপাৰাস্থিত অসম পশু চিকিৎসা বিজ্ঞান মহাবিদ্যালয় খেলপথাৰ৷

এই ১৪ দিনত ৭ কোটি ৪০ লাখ টকাৰ কিতাপ বিক্রীৰ অভিলেখ ৰচনাৰে অসম প্রকাশন পৰিষদ আৰু সদৌ অসম পুথি প্রকাশক আৰু বিক্রেতা সংস্থাই যৌথভাৱে আয়োজন কৰা গ্রন্থমেলাৰ সামৰণি পৰে৷

গ্রন্থমেলাৰ সামৰণি উপলক্ষে এক সামৰণী অনুষ্ঠানো অনুষ্ঠিত হয়৷ সামৰণী সভাত মুখ্য অতিথিৰ আসন শুৱনি কৰে শিক্ষামন্ত্রী তথা অসম প্রকাশন পৰিষদৰ অধ্যক্ষ ডাঃ ৰণোজ পেগুৱে৷ নিজৰ ভাষণত মন্ত্রীগৰাকীয়ে কয়– গীতৰ সভাত যেনেদৰে শ্রোতাই প্রধান অলংকাৰ, তেনেদৰে গ্রন্থমেলাত পঢ়ুৱৈয়ে প্রধান অলংকাৰ৷ গ্রন্থমেলাত কিতাপ বিক্রীৰ পৰিসংখ্যাই আনন্দ দিছে৷ মই সদায়ে কৈ আহিছোঁ যে কিতাপ পঢ়া মানুহৰ সংখ্যা কমা নাই৷ কাৰণ মানুহে জ্ঞানৰ সাধনা কৰে৷ প্রজ্ঞাৰ সাধনা কৰে৷

জ্ঞান বা প্রজ্ঞাৰ মূল আধাৰ কিতাপ৷ অৱশ্যে বহুতে ই–বুক পঢ়িবলৈ লৈছে৷ তথাপি পঢ়ুুৱৈৰ সংখ্যা কমা নাই৷ তেওঁ লগতে কয় যে কৃত্রিম বুদ্ধিমত্তাৰ লগতে আৱেগিক বুদ্ধিমত্তাৰো প্রয়োজন আছে৷ প্রশান্তিৰ বাবে, মানসিক সন্তুলনৰ বাবে গান শুনা আৰু কিতাপ পঢ়াৰ প্রয়োজন ৷ কিতাপ পঢ়ি আমি প্রশান্তি আৰু প্রেৰণা লাভ কৰিব পাৰোঁ৷ সেয়ে গ্রন্থ আন্দোলনৰ প্রয়োজন আছে৷

অসম প্রকাশন পৰিষদে অনাগত সময়তো উৎসাহেৰে গ্রন্থমেলা আয়োজন কৰিব বুলি আশ্বাস প্রদান কৰে শিক্ষামন্ত্রী তথা অসম প্রকাশন পৰিষদৰ অধ্যক্ষ ডাঃ পেগুৱে৷

সভাত সন্মানীয় অতিথিৰ আসন শুৱনি কৰে সাহিত্য অকাডেমি সন্মানপ্রাপক ওড়িশাৰ বিশিষ্ট সাহিত্যিক পাৰমিতা শতপথীয়ে৷ তেওঁ কয়– ‘অসমত গ্রন্থক কেন্দ্র কৰি যি উৎসৱ উদযাপিত হৈছে এয়া দেখি অভিভূত হৈ পৰিছোঁ ৷ এই পৰিৱেশে নিশ্চিতি প্রদান কৰিছে যে গ্রন্থ কোনোদিনে শেষ হৈ নাযায়৷ অসম গ্রন্থমেলাত অংশগ্রহণ কৰি আনন্দিত হৈছোঁ৷’

অসমক দেশৰ ভিতৰতে মনোৰম প্রাকৃতিক সৌন্দর্যৰ অন্যতম ৰাজ্য বুলি অভিহিত কৰি তেওঁ কয় যে ব্রহ্মপুত্র নদীয়ে অসমক জীৱনীশক্তি প্রদান কৰিছে৷ ইয়াৰ মানুহ, সাহিত্য–সংস্কৃতি, খাদ্যাভ্যাস আৰু বেশভূষা অতি আকর্ষণীয়৷ অসমৰ জ্ঞান চর্চাৰো ঐতিহাসিক সুনাম আছে৷ সেইবাবেই অসমৰ সাহিত্য–সংস্কৃতি উন্নতমানৰ৷ তেওঁ অসমীয়া ভাষাই ধ্রুপদী ভাষাৰ মর্যাদা লাভ কৰাৰ বাবে অসমবাসীক অভিনন্দন জনাই কয়– ‘অসমীয়া আৰু উড়িয়া ভাষাৰ মিল আছে৷ দুয়োটা ভাষাৰ প্রাচীনতম উৎসতে এই মিল ৰৈছে৷ উড়িয়াৰ পৰা অসমীয়া আৰু অসমীয়াৰ পৰা উড়িয়ালৈ অধিক অনুবাদ হ’লে দুয়োটা ভাষা সমৃদ্ধ হ’ব৷’

সভাখনত বিশিষ্ট অতিথিৰূপে অংশগ্রহণ কৰি বিশিষ্ট সাহিত্যিক–সাংবাদিক, পদ্মশ্রী অৰূপ কুমাৰ দত্তই ভাষণ প্রসংগত কয় যে অসম গ্রন্থমেলা এতিয়া কলিকতা গ্রন্থমেলাৰ সমতুল্য হৈছে৷ ইয়াৰ দৃশ্যপট আৰু কিতাপ বিক্রীৰ পৰিসংখ্যাই এয়া প্রতিপন্ন কৰিছে৷ এয়া ভাল লগা কথা৷ ভাষণ প্রসংগত তেওঁ কয়– ‘প্রকৃত সাহিত্য আৰু প্রকৃত সাহিত্যিকে আমাক সত্যৰ সৈতে মুখামুখি কৰাই দিয়ে৷ গতিকে প্রকৃত সাহিত্য সদায়ে থাকি যাব৷ কিন্তু এতিয়া প্রকৃত সাহিত্যৰ প্রকাশ কমি অহা দেখা গৈছে৷ ইয়াৰ বাবে পঢ়ুৱৈ সমাজো দায়বদ্ধ ৷ তেওঁলোকে প্রকৃত সাহিত্য আৰু জনপ্রিয় সাহিত্যিকৰ মাজৰ পার্থক্য বুজি পাব লাগিব৷ সাহিত্য আৰু ‘পপুলিষ্ট লিটাৰাচাৰ’ৰ পার্থক্য আমি জানিবই লাগিব৷’

আন এগৰাকী বিশিষ্ট অতিথি, সাহিত্য অকাডেমিৰ অসমীয়া ভাষা উপদেষ্টা পৰিষদৰ আহ্বায়ক দিগন্ত বিশ্ব শর্মাই ভাষণত কয় যে অসমত গ্রন্থ বিপ্লৱ ত্বৰান্বিত কৰিছে অসম গ্রন্থমেলাই৷ কিন্তু আমি নিজক প্রশ্ন কৰাৰ সময় আহিছে যে সাহিত্যই প্রকৃত পোহৰ হেৰুৱাইছে নেকি? যদি হেৰুৱাইছে তেন্তে পোহৰৰ বাট আমাক কোনে দেখুৱাব? জ্যোতিপ্রসাদ আগৰৱালায়ো সাহিত্যই পোহৰ দেখুওৱাৰ কথা কৈছিল৷ বিষয় প্রসংগৰে তেওঁ পুনৰ কয়– ‘কপিসুলভ দৃষ্টিভংগীৰে আমি সমুদ্রৰ সিপাৰৰ দর্শন অনুসৰণ কৰোঁ৷ অথচ দহ হাজাৰ বছৰ পূর্বেই বেদৰ জৰিয়তে ভাৰতীয় সভ্যতাই দর্শনত দেখুৱাইছিল৷ ভাৰতবর্ষৰ সাহিত্যৰ এই সনাতন প্রমূল্য আমি জানিব লাগিব৷

সাহিত্য–সংগীত–কলা জগতক সুন্দৰ কৰে৷ এয়া নাথাকিলে মানুহ শিং আৰু নেজ নোহোৱা পশুহে হ’ব বুলি ভক্তি হৰিৰ দৰে মনীষীয়ে কৈ গৈছে৷ জ্যোতিপ্রসাদ আগৰৱালায়ো কৈছে–সুন্দৰে যে ফুলাৰ মন্ত্র/অহোৰাত্রি মাতে/সেয়েহে আজি ইমান ফুল প্রভাতে প্রভাতে… ৰূপান্তৰেহে জগত ধুনীয়া কৰে/এয়ে মোৰ গায়ত্রী মন্ত্র…৷ এয়ে সাহিত্যই দেখুওৱা পোহৰৰ বাট৷ গ্রন্থ হৈছে জ্ঞানৰ পেৰা৷ এই জ্ঞান মুকলি কৰি দিয়া গ্রন্থ সদায়ে থাকিব৷’

অসম প্রকাশন পৰিষদৰ উপাধ্যক্ষ, অভিধান প্রণেতা সুমন্ত চলিহায়ো সভাখনত বিশিষ্ট অতিথি হিচাপে উপস্থিত থাকি ধন্যবাদসূচক বক্তব্য আগবঢ়ায়৷

উল্লেখ্য যে গ্রন্থমেলাৰ সামৰণী সভাতে সাহিত্যিক ড০ দীপক কুমাৰ বৰকাকতিক ‘ঐশ্বর্য’ উপন্যাসৰ বাবে অসম প্রকাশন পৰিষদ সাহিত্য বঁটা–২০২৫ প্রদান কৰা হয়৷ এই বঁটাত আছে ৫ লাখ টকা, অংগবস্ত্র, মানপত্র আৰু মূল্যৱান কিতাপৰ টোপোলা৷

একেদৰে প্রকাশকৰ বাবে অসম প্রকাশন পৰিষদ সাহিত্য বঁটা–২০২৫ প্রদান কৰা হয় বান্ধৱ প্রকাশনৰ স্বত্বাধিকাৰী ৰঞ্জনজ্যোতি শর্মাক৷ এই বঁটাত আছে ৩ লাখ টকা, অংগবস্ত্র আৰু মূল্যৱান কিতাপৰ টোপোলা ৷ দুয়োটা বঁটা প্রদান কৰে শিক্ষামন্ত্রী তথা অসম প্রকাশন পৰিষদৰ অধ্যক্ষ ডাঃ ৰণোজ পেগুৱে৷

একেখন সভাতে অসম প্রকাশন পৰিষদৰ উদ্যোগত প্রস্তুত কৰা ‘ম’ডার্ন গ্ল’চাৰি (এংলো–আছামিজ)’ এপটো শিক্ষামন্ত্রী ডাঃ ৰণোজ পেগুৱে মুকলি কৰে৷ এপটো প্রস্তুত কৰিছে ভাষা প্রযুক্তিবিদ ড০ গুণদীপ চেতিয়া আৰু ভাষাবিদ ড০ ভাস্কৰজ্যোতি শর্মাই৷ এপটো এনড্রইড ম’বাইল আৰু আইফোনত উপলব্ধ হ’ব৷

ডিজিটেল ডেস্ক, ৭ জানুৱাৰী

লগতে এইটোও পঢ়ক — সম্পাদকীয় : শিক্ষা আৰু নিয়োগ