চলিত টি–২০ বিশ্বকাপত ভাৰতৰ বিৰুদ্ধে পাকিস্তানে খেলিবলৈ সন্মত হোৱাত ক্রিকেট জগতখন বৃহৎ আর্থিক ক্ষতিৰ পৰা ৰক্ষা পৰিল৷ জানিব পৰা মতে এই মেচখন অনুষ্ঠিত নহ’লে আইচিচিৰ ১৫০০ কোটিৰো অধিক লোকচান হ’লহেঁতেন৷
এক সূত্রৰ মতে, যদি ১৫ ফেব্রুৱাৰীৰ খেলখন অনুষ্ঠিত নহ’লহেঁতেন তেন্তে আইচিচিৰ ১৭৪ মিলিয়ন ডলাৰ লোকচান হ’লহেঁতেন৷ ভাৰতীয় মুদ্রাত এই ধনৰাশি ১,৫৭৫ কোটি ৬১ লাখ ৩৫ হাজাৰ টকা৷ ক্রিকেট খেলা দেশসমূহেও এই ক্ষতিৰ পৰা ৰক্ষা পৰিল৷
কাৰণ, আইচিচিয়ে যদি এই বৃহৎ লোকচানৰ সন্মুখীন হ’লহেঁতেন, তেন্তে সদস্য দেশসমূহেও বহুত কম ধন লাভ কৰিলেহেঁতেন৷ সম্প্রচাৰ কোম্পানী, টিকটৰ ধন আৰু অন্যান্য পৃষ্ঠপোষকতাকে ধৰি মুঠ সম্ভাব্য লোকচান প্রায় ১৭৪ মিলিয়ন ডলাৰ হ’লহেঁতেন৷
সোমবাৰে নির্ধাৰিত সময়সূচীমতে ভাৰত–পাকিস্তানৰ মেচ অনুষ্ঠিত হ’ব বুলি ঘোষণা কৰাৰ কিছু মিনিটৰ ভিতৰতে কলম্বোগামী বিমানৰ ভাৰা ১০ হাজাৰৰ পৰা ৬০ হাজাৰ টকালৈ বৃদ্ধি পায়৷ সোমবাৰে নিশা পাকিস্তান চৰকাৰে ঘোষণা কৰে যে বিশ্বকাপত নির্ধাৰিত সময়সূচী অনুসৰি ভাৰতৰ বিৰুদ্ধে খেলখন খেলিব৷
পাকিস্তান ক্রিকেট ব’ৰ্ডৰ অধ্যক্ষ মহছিন নাকভিয়ে প্রধানমন্ত্রী শ্বাহবাজ শ্বৰীফক সাক্ষাৎ কৰে৷ ইয়াৰ পূর্বে দেওবাৰে নাকভিয়ে আইচিচি আৰু বাংলাদেশ ক্রিকেট ব’ৰ্ডৰ সৈতে বৈঠকত মিলিত হয়৷
নাকভিয়ে কয় যে বিচিবিয়ে পাকিস্তানক ভাৰতৰ সৈতে খেল খেলিবলৈ অনুৰোধ জনাইছে৷ সংযুক্ত আৰব আমিৰশ্বাহী আৰু শ্রীলংকাৰ পৰাও একেই অনুৰোধ আহিছিল৷ এই অনুৰোধৰ পিছত পাকিস্তানৰ শীর্ষ নেতৃত্বই মেচখন খেলাৰ সিদ্ধান্ত লয়৷
পাকিস্তান চৰকাৰে এক বিবৃতিত কয়, ‘বন্বুূত্বপূর্ণ দেশসমূহৰ বিভিন্ন আলোচনা আৰু অনুৰোধৰ অন্তত পাকিস্তান চৰকাৰে দেশৰ ক্রিকেট দলটোক ভাৰতৰ বিৰুদ্ধে খেলাৰ অনুমতি দিয়ে৷ ক্রিকেটৰ সংস্কৃতি ৰক্ষা আৰু সদস্য দেশসমূহৰ মাজত ক্রিকেটক অধিক জনপ্রিয় কৰি তোলাৰ প্রতি লক্ষ্য ৰাখি এই সিদ্ধান্ত গ্রহণ কৰা হৈছে৷’
পাকিস্তানৰ প্রধানমন্ত্রীয়ে দেশৰ ক্রিকেট দলক অভিনন্দন জ্ঞাপন কৰে৷ ক্রিকেটাৰসকলে খেলপথাৰত ক্রীড়াপ্রেমী আচৰণ বজাই ৰাখিব বুলি তেওঁ আশা প্রকাশ কৰে৷
ডিজিটেল ডেস্ক, ১১ ফেব্ৰুৱাৰী