নিয়মীয়া বাৰ্তা, ২১ এপ্রিলঃ ক’ৰোনা ভাইৰাছ মহামাৰীত আটাইতকৈ আক্রান্ত আমেৰিকাৰ এখন সংবাদ–পত্রই ১৫ পৃষ্ঠাকৈ মৃত্যু সম্পর্কীয় বার্তাৰ বিজ্ঞাপন প্রচাৰ কৰা ঘটনাই বিশ্বজুৰি সৃষ্টি কৰিছে শিহৰণ ৷ ৭ লাখ ৫৮ হাজাৰতকৈ অধিক লোক ক’ৰোনা ভাইৰাছত আক্রান্ত হোৱা আমেৰিকাত প্রাণ হেৰুৱাইছে ৪০ সহস্রাধিকে ৷ দেশখনৰ ব’ষ্টন গ্ল’ব নামৰ দৈনিক কাকতখনে দেওবাৰে ১৫ পৃষ্ঠাকৈ মৃত্যু সম্পর্কীয় বার্তাৰ বিজ্ঞাপন প্রকাশ কৰিছে ৷ মাছাচুছেটছৰ এই কাকতখনে এটা সংস্কৰণতে ইমানসংখ্যক লোকৰ মৃত্যুৰ বিজ্ঞাপন প্রকাশ কৰি আমেৰিকাৰ সংবাদ–পত্রত নতুন অভিলেখ সৃষ্টি কৰিছে৷ স্মর্তব্য যে মাছাচুছেটছত ৩৮ সহস্রাধিক লোক মাৰাত্মক ভাইৰাছবিধৰ দ্বাৰা আক্রান্ত হৈছে৷ মাছাচুছেটছত এই ভাইৰাছবিধত আক্রান্ত হৈ প্রাণ হেৰুৱাইছে ১৭ সহস্রাধিক লোকে৷ লক্ষণীয়ভাৱে সংবাদ–পত্রখনে এই মৃত্যুৰ বিজ্ঞাপন প্রকাশ কৰাৰ লগে লগে ৰিপাব্লিকান গৱর্নৰ চার্লি বাকেৰে এয়া ‘ৰাষ্ট্রৰ চেহেৰা’ বুলি অভিহিত কৰিছে৷ বর্তমান ক’ৰোনা মহামাৰীৰ মধ্যস্তৰত আমেৰিকা উপনীত হোৱা বুলিও গৱর্নৰগৰাকীয়ে উল্লেখ কৰিছে ৷