নিয়মীয়া বাৰ্তা, ৩১ জুলাইঃ কেন্দ্রীয় চৰকাৰে গ্রহণ কৰা নতুন ৰাষ্ট্রীয় শিক্ষানীতিক উষ্ম আদৰণি জনাইছে অসমৰ শিক্ষামন্ত্রী ড০ হিমন্ত বিশ্ব শর্মাই৷ এই সম্পর্কত তেওঁ কয় যে নতুন শিক্ষানীতিয়ে শিকন আৰু শিক্ষণৰ পৰিৱেশত এক নতুনত্ব আনিব৷ এই নতুন শিক্ষানীতিয়ে সামগ্রিক দৃষ্টিৰে সকলোকে সামৰি ল’ব৷ নতুন ৰাষ্ট্রীয় শিক্ষানীতিত মাতৃভাষা আৰু আঞ্চলিক ভাষাৰ ওপৰত গুৰুত্ব প্রদান কৰাটো প্রশংসনীয়৷
ইয়াৰ বাবে তেওঁ কেন্দ্রীয় মানৱ সম্পদ উন্নয়নমন্ত্রী ড০ ৰমেশ পোখৰিয়াল নিশাংকক ধন্যবাদ জ্ঞাপন কৰে৷ সংবাদ মাধ্যমৰ আগত মন্ত্রী ড০ শর্মাই কয় যে নতুন শিক্ষানীতিৰ স্বৰূপটো ৰাজ্য চৰকাৰে অধ্যয়ন কৰিব৷ তাৰ পিছত অসমত কেনেধৰণৰ পৰিৱর্তন আনিব লাগিব, সেই সম্পর্কত আলোচনা কৰি অচিৰেই বিষয়টো কেবিনেটলৈ অনা হ’ব৷ সেইদৰে ৰাজ্যত শিক্ষানুষ্ঠান খোলা সম্পর্কত তেওঁ কয় যে অহা ৩১ আগষ্ট পর্যন্ত ভাৰত চৰকাৰে সমগ্র দেশতে শিক্ষানুষ্ঠান বন্ধ কৰি ৰাখিছে৷ অহা ১ ছেপ্ঢেম্বৰৰ পৰা শিক্ষানুষ্ঠান খোলাৰ সম্পর্কত ৰাজ্য চৰকাৰে এছঅ’পি সাজু কৰি ৰাখিছে৷ ভাৰত চৰকাৰে ১ ছেপ্ঢেম্বৰত যদি শিক্ষানুষ্ঠান খোলাৰ ব্যৱস্থা কৰে অসমেও যাতে লগে লগে শিক্ষানুষ্ঠানসমূহ খুলিব পাৰে, তাৰ বাবে প্রস্তুতি সাজু কৰি ৰাখিছে৷