নিয়মীয়া বাৰ্তা, ১১ আগষ্টঃ দেশৰ প্রাক্তন ৰাষ্ট্রপতি প্রণৱ মুখার্জীৰ আজি ৰাজধানী দিল্লীস্থিত সেনাৰ ৰিছার্চ এণ্ড ৰেফাৰেল হাস্পতালত মগজুৰ এক অস্ত্রোপচাৰ সফলতাৰে সম্পন্ন কৰা হয়৷ মগজুৰ এই অস্ত্রোপচাৰৰ পাছতে প্রাক্তন ৰাষ্ট্রপতিগৰাকী ভেণ্টিলেটৰত ৰখা হৈছে৷ উল্লেখনীয় যে ইয়াৰ পূর্বে পুৱাৰ ভাগত ছ’চিয়েল মিডিয়া টুইটাৰযোগে ভাৰতৰত্ন মুখার্জীয়ে এই কথা সদৰী কৰে যে তেওঁ ক’ভিড–১৯ত সংক্রমিত হৈছে৷ মুখার্জীয়ে এই কথা সদৰী কৰাৰ উপৰি সপ্তাহটোৰ ভিতৰত তেওঁৰ সংস্পর্শলৈ অহা লোকসকলক আইছ’লেচনত থকাৰ অনুৰোধো জনায়৷
৮৪ বছৰীয়া মুখার্জীয়ে টুইটাৰযোগে এই কথা সদৰী কৰাৰ পাছতেই শুভাকাংক্ষীসকলে নেতাগৰাকীৰ আশু আৰোগ্য কামনা কৰি ছ’চিয়েল মিডিয়াত বার্তা বিনিময় কৰিবলৈ লয়৷ ইফালে প্রাক্তন ৰাষ্ট্রপতি ভাৰতৰত্ন মুখার্জীৰ মগজুৰ অস্ত্রোপচাৰৰ পাছত নেতাগৰাকীৰ অনুৰাগীসকলে আশু আৰোগ্য কামনা কৰিবলৈ লয়৷ ৰাষ্ট্রপতি ৰাম নাথ কোৱিন্দৰ উপৰি কেন্দ্রীয় মন্ত্রীসকলৰ লগতে জ্যেষ্ঠ কংগ্রেছ নেতাসকলে হাস্পতালৰ পৰা শীঘ্রে মুখার্জী আৰোগ্য হৈ ঘৰলৈ উভতিব বুলি আশা প্রকাশ কৰে৷ প্রতিৰক্ষা মন্ত্রী ৰাজনাথ সিঙে হাস্পতাললৈ গৈ প্রাক্তন ৰাষ্ট্রপতিগৰাকীৰ স্বাস্থ্যৰ বুজ লয়৷
মুখার্জীৰ পুত্র তথা কংগ্রেছ নেতা অভিজিৎ মুখার্জীয়ে পিতৃৰ আশু আৰোগ্য কামনা কৰাৰ উপৰি এই মুহূর্তত যিসকল গুণমুগ্ধই নেতাগৰাকীৰ খা–খবৰ লৈ সাত্ব্ন্না দিছে, সকলোকে তেওঁ ধন্যবাদো জ্ঞাপন কৰে৷ ইয়াৰ পূর্বে মুখার্জী ক’ভিড–১৯ত আক্রান্ত হোৱাৰ খবৰ পোৱাৰ পাছতে দিল্লীৰ মুখ্যমন্ত্রী অৰবিন্দ কেজৰিৱালে টুইটাৰযোগে প্রাক্তন ৰাষ্ট্রপতিগৰাকীৰ আশু আৰোগ্য আৰু সুস্বাস্থ্য কামনা কৰে৷