নিয়মীয়া বাৰ্তা, ২৭ ডিচেম্বৰঃ কেন্দ্রীয় চৰকাৰে প্রণয়ন কৰা তিনিখন কৃষি আইনৰ বিৰুদ্ধে প্রতিবাদ জনাই বিজেপিৰ সহযোগী ৰাষ্ট্রীয় লোকতান্ত্রিক পার্টী (আৰএলপি)য়ে এনডিএৰ সৈতে সম্পর্ক ছেদ কৰিছে৷ উল্লেখনীয় যে ৰাজস্থান বিধানসভাত তিনিগৰাকী বিধায়ক তথা আৰএলপি এনডিএৰ অন্যতম সংযোগী আছিল৷
হনুমান বেনিৱাল নেতৃত্বাধীন আৰএলপি হৈছে এনডিএৰ পৰা কৃষি আইনৰ বিৰোধ কৰি আঁতৰি যোৱা দ্বিতীয়টো ৰাজনৈতিক দল৷ ইয়াৰ পূর্বে শিৰোমণি আকালি দলে কৃষি আইনৰ প্রতিবাদ জনাই এনডিএ ত্যাগ কৰিছিল৷ অৱশ্যে ৰাজস্থানৰ নাগাউৰ সমষ্টিৰ সাংসদ আৰ এল পিৰ নেতাগৰাকীয়ে ঘোষণা কৰিছে যে তেওঁ এন ডি এৰ পৰা আঁতৰি গ’লেও কংগ্রেছৰ সৈতে মিত্রতা নকৰে৷
কালি চাহজাহানপুৰত এক কৃষক সমাৱেশত অংশগ্রহণ কৰি বেনিৱালে কেন্দ্রৰ কৃষি আইন কৃষকবিৰোধী বুলি অভিহিত কৰে৷ ইফালে, দিল্লীৰ সীমান্তত প্রতিবাদ সাব্যস্ত কৰি থকা কৃষকসকলে আগন্তুক ২৯ ডিচেম্বৰত কেন্দ্রক আলোচনা অনুষ্ঠিত কৰাৰ আহ্বান জনাইছে৷