গুৱাহাটীত বাইপাছেৰে নতুন ৰে’লপথ নির্মাণৰ জৰীপ

নিয়মীয়া বাৰ্তা, ২০ ডিচেম্বৰঃ গুৱাহাটী মহানগৰীৰ কামাখ্যা ষ্টেচনৰ পৰা নাৰেংগীলৈ যোৱা ৰে’ললাইনটোৰ বাবে মহানগৰীত যান–জঁটকে ধৰি সর্বসাধাৰণ নাগৰিক বিভিন্ন সমস্যাৰ সন্মুখীন হ’বলগীয়া হৈছে৷ এই সমস্যাৰ পৰা নাগৰিকক সকাহ দিয়াৰ বাবে এনএফ ৰে’লৱেই গুৱাহাটী মহানগৰীৰ বাইপাছেৰে নতুনকৈ ৰে’ললাইন নির্মাণ কৰাৰ বাবে জৰীপ আৰম্ভ কৰিছে৷

এনএফ ৰে’লৱেৰ মুখ্য জনসম্পর্কৰক্ষী বিষয়া শুভানন চন্দই এই সন্দর্ভত জানিবলৈ দিয়া মতে, ৰে’লৱে কর্তৃপক্ষই মহানগৰীৰ বাইপাছেৰে এটা নতুন ৰে’লপথ নির্মাণ কৰাৰ বাবে এক জৰীপ আৰম্ভ কৰিছে৷

অৱশ্যে এই জৰীপ প্রাৰম্ভিক পর্যায়তে আছে আৰু জৰীপ সম্পূর্ণ হোৱাৰ পিছতহে বাইপাছেৰে ৰে’লপথ নির্মাণ কৰিব পৰা যাব নে নাই, ই কিমান ফলপ্রসূ হ’ব, তাক মূল্যায়ন কৰা হ’ব৷ জৰীপ চলোৱা উচ্চ ক্ষমতাসম্পন্ন কাৰিকৰী বিশেষজ্ঞ সমিতিয়ে যদি অনুমোদন জনায়, তেতিয়া বাইপাছেৰে ৰে’ললাইন নির্মাণৰ বিষয়টো চূড়ান্ত কৰা হ’ব৷ তদুপৰি ৰে’ল পৰিচালনাত দক্ষতা বৃদ্ধিৰ লগতে ৰে’ল সেৱাৰ মান উন্নত কৰাৰ লক্ষ্যৰে এন এফ ৰে’লৱে কর্তৃপক্ষই ৭৬৮ কোটি টকা ব্যয়েৰে ২৪টা প্রকল্প ৰূপায়ণ কৰাৰ লক্ষ্য নির্ধাৰণ কৰিছে৷

ইয়াৰে ৬৪৫ কোটি টকা ব্যয়েৰে সাতটা প্রকল্প ৰূপায়ণ কৰা হৈছে আৰু অনাগত দিনত ১২৩ কোটি টকা ব্যয়েৰে ১৭টা প্রকল্প ৰূপায়ণ কৰা হ’ব৷

তেনেদৰে ৰে’লৰ চলাচল সুচল কৰাৰ বাবে নিউ গুৱাহাটী ষ্টেচনত অতিৰিক্ত ৰে’লৱে লাইন নির্মাণৰ আঁচনি গ্রহণ কৰা বুলি মুখ্য জনসম্পর্কৰক্ষী বিষয়াগৰাকীয়ে জানিবলৈ দিয়ে৷