নিয়মীয়া বাৰ্তা, ২০ জানুৱাৰীঃ ইংলেণ্ডৰ বিৰুদ্ধে অহা মাহত খেলিবলগীয়া টেষ্ট শৃংখলাৰ প্রথম দুখন মেচৰ বাবে ভাৰতীয় দল আজি ঘোষণা কৰা হৈছে৷ চেতন শর্মা নেতৃত্বাধীন ৰাষ্ট্রীয় নির্বাচক মণ্ডলীয়ে ঘোষণা কৰা এই দলটোলৈ প্রত্যাৱর্তন ঘটিছে নিয়মীয়া অধিনায়ক বিৰাট কোহলি, তাৰকা বেগী বলাৰ ঈশান্ত শর্মা আৰু অলৰাউণ্ডাৰ হার্দিক পাণ্ডিয়াৰ৷ উল্লেখ্য যে পিতৃত্বকালীন ছুটীৰ বাবে অধিনায়ক কোহলিয়ে অষ্ট্রেলিয়াৰ বিৰুদ্ধে প্রথম টেষ্ট খেলিয়ে দেশলৈ উভতিছিল৷
ইফালে, আঘাতৰ বাবে অষ্ট্রেলিয়া ভ্রমণৰ টেষ্ট দলত অন্তর্ভুক্ত হোৱা নাছিল হার্দিক আৰু ঈশান্ত৷ আঘাতৰ বাবে ব্রিছবেন টেষ্টত অংশ ল’ব নোৱাৰা বেগী বলাৰ যশপ্রীত বুমৰাহ আৰু অফ স্পীনাৰ ৰবিচন্দ্রন অশ্বিনো দলটোত স্থান লাভ কৰিবলৈ সক্ষম হৈছে৷ ভাৰতৰ স্পীন সহায়ক উইকেটৰ প্রতি লক্ষ্য ৰাখি নির্বাচক মণ্ডলীয়ে অশ্বিন, কুলদীপ যাদৱ আৰু ৱাশ্বিংটন সুন্দৰৰ সৈতে অক্ষৰ পেটেলকো দলত অন্তর্ভুক্ত কৰিছে৷
অষ্ট্রেলিয়াৰ বিৰুদ্ধে চমকপ্রদ প্রদর্শন দাঙি ধৰা মহম্মদ চিৰাজ, ছার্দুল ঠাকুৰেও ঘোষিত দলটোত স্থান পাইছে৷ উল্লেখ্য যে ভাৰতে অহা ৫ ফেব্রুৱাৰীৰ পৰা ইংলেণ্ডৰ বিৰুদ্ধে প্রথমখন টেষ্ট খেলিব৷
দলটোঃ কোহলি (অধিনায়ক), ৰাহানে, ৰোহিত, শুভমন, মায়ংক, পূজাৰা, ঋদ্ধিমান, হার্দিক, কে এল ৰাহুল, পণ্ট, বুমৰাহ, ঈশান্ত, চিৰাজ, ছার্দুল, অশ্বিন, কুলদীপ, ৱাশ্বিংটন আৰু অক্ষৰ পেটেল৷