নিয়মীয়া বাৰ্তা সোণাৰি চাপৰি ২৩ মাৰ্চঃ সোণাৰি চাপৰি আৰক্ষী চকীৰ অন্তগত ২ নং পতীয়া চাপৰিত আজি সংঘটিত বিধ্বংসী অগ্নিকাণ্ডত দুলু চুতীয়া নামৰ মহিলাগৰাকীৰ এক মাত্ৰ বাসগৃহটো ভস্মীভূত হোৱাত লক্ষাধিক টকাৰ সা-সম্পত্তি বিনষ্ট হয়৷ জানিব পৰা মতে পুৱা ৯ মান বজাতেই স্বামীহাৰা মহিলাগৰাকীয়ে ঘৰত দুই সন্তানক থৈ বিশেষ কামত ওলাই যোৱাৰ পিছত সন্তানে জুই লৈ খেলি থকাৰ ফলতে চাংঘৰৰ তলত থকা ইকৰাৰ বেৰত জুই লাগি নিমিখতে ঘৰটো জুইৰ লেলিহান শিখাই বেৰি ধৰে৷ ঘটনাৰ আকস্মিকতাত বিতত হৈ দুই পুত্ৰ কন্যাই চিঞৰ বাখৰ কৰি চাংঘৰৰ পৰা জপিয়াই প্ৰাণ ৰক্ষা কৰে আৰু প্ৰতিবেশী গঞাই আহি জুই নুমুৱাবলৈ চেষ্টা কৰাৰ লগতে অগ্নি নিৰ্বাপক বাহিনীক খবৰ দিয়াত ঢকুৱাখনাৰ পৰা অগ্নি নিৰ্বাপক বাহিনীৰ লোক আহি জুই নুমুৱাবলৈ সক্ষম হয় যদিও ঘৰৰ লাম লাকুতা সকলো জুইত জাহ যায়৷ অগ্নিকাণ্ডৰ ফলত ঘৰৰ সমস্ত বয় বস্তু জ্বলি ছাইত পৰিণত হোৱাত সৰ্বহাৰা হয় পৰিয়ালটো ৷