ৰাজ্যত সুৰা–গুট্খাৰ অবাধ বিক্রীক লৈ তীব্র অসন্তুষ্টি ৰাজ্যপাল জগদীশ মুখীৰ

নিয়মীয়া বাৰ্তা,৫ জুনঃ সুৰাৰ দাম বৃদ্ধিৰে ৰাজহ সংগ্রহ কৰি ৰাজকোষ টনকিয়াল কৰিবলৈ ওলোৱাৰ সময়তে শনিবাৰে সুৰা–গুট্খাৰ অবাধ প্রচলনক লৈ উদ্বিগ্ণতা প্রকাশ কৰিলে খোদ ৰাজ্যপাল অধ্যাপক জগদীশ মুখীয়ে৷ ড্রাগ্ছ–ধঁপাতৰ বিৰুদ্ধে সজাগতা সৃষ্টিৰ লক্ষ্যৰে আৰম্ভ কৰা এক কার্যসূচী মুকলি কৰি ৰাজ্যপালগৰাকীৰ মন্তব্য– যি হাৰত অসমত সুৰাৰ প্রচলন হৈ আছে, তাক হ্রাস কৰিব লাগে৷ ড্রাগ্ছ–সুৰাই যুৱ প্রজন্মক গ্রাস কৰি আনিছে বুলি উল্লেখ কৰি ৰাজ্যপালগৰাকীয়ে কয়– ড্রাগ্ছৰ ব্যৱহাৰে যুৱকসকলক প্রভাৱান্বিত কৰিছে আৰু সমাজত এক বাধা তথা অশান্তিৰ সৃষ্টি কৰিছে৷ অসমত প্রায় ২০.৪ লাখ লোকে ড্রাগ্ছ ব্যৱহাৰ কৰে বুলি এক তথ্য আঙুলিয়াই তেওঁ ড্রাগ্ছৰ বিৰুদ্ধে অধিক কঠোৰ হ’বলৈও আৰক্ষীক আহ্বান জনায়৷

আনহাতে, সুৰাৰ প্রচলন কমাবলৈ শনিবাৰে ৰাজ্যত এক কঠোৰ আইন প্রণয়নৰো পোষকতা কৰে ৰাজ্যপালগৰাকীয়ে৷ উল্লেখ্য যে ৰাজভৱনত কালি ড্রাগ্ছ–ধঁপাত আৰু সুৰাৰ সজাগতাৰ এক ৬০ দিনীয়া অভিযানৰ ফ্লেগ অফ কৰে ৰাজ্যপাল অধ্যাপক মুখীয়ে৷ স্বেচ্ছাসেৱী সংগঠন এটাই আয়োজন কৰা এই অভিযান মুকলি কৰি ৰাজ্যপালগৰাকীয়ে গুট্খাৰ প্রচলনক লৈও তীব্র অসন্তুষ্টি প্রকাশ কৰে৷ ৰাজভৱনত অনুষ্ঠিত এই অনুষ্ঠানত উপস্থিত থকা আৰক্ষী সঞ্চালকপ্রধান ভাস্কৰজ্যোতি মহন্তৰ সমুখতে আৰক্ষীক সমালোচনা কৰি ৰাজ্যপালগৰাকীয়ে কয়– উচ্চতম ন্যায়ালয়ৰ নির্দেশৰ পাছত প্রতিখন ৰাজ্যত গুট্খা নিষিদ্ধ কৰাৰ বাবে আইন প্রণয়ন হৈছে৷ ইয়াৰ পাছতো কিদৰে ৰাজ্যত গুট্খা বিক্রী হয়, সেয়া সমস্যাৰ বিষয়৷ এইক্ষেত্রত আৰক্ষীৰ ভূমিকাক আমি সন্মান দিব নোৱাৰোঁ৷

ভাষণ প্রসংগত ৰাজ্যপালগৰাকীয়ে কয় যে জনসাধাৰণৰ মাজত সুৰা–ড্রাগ্ছ আৰু ধঁপাতৰ বিৰুদ্ধে সজাগতা সৃষ্টি কৰাৰ যথেষ্ট প্রয়োজন আছে৷ ড্রাগ্ছে যুৱ প্রজন্মক গ্রাস কৰাৰ লগতে সামাজিকভাৱে, সাংস্কৃতিকভাৱে আৰু অর্থনৈতিকভাৱে একোটা পৰিয়ালক যথেষ্ট ক্ষতি কৰি আহিছে৷ অসমত এক বৃহৎ পৰিমাণৰ লোকে ড্রাগ্ছৰ কৰাল গ্রাসত সোমাই পৰিছে৷ সেয়েহে ড্রাগ্ছৰ বিৰুদ্ধে সজাগতা অধিক বৃদ্ধিৰ প্রয়োজন৷ ৰাজ্যপালে তেওঁৰ ভাষণত অৱশ্যে ড্রাগ্ছ সৰবৰাহকাৰীৰ বিৰুদ্ধে অসম আৰক্ষীয়ে যোৱা সময়ছোৱাত গ্রহণ কৰি অহা কঠোৰ পদক্ষেপৰ শলাগ লয়৷

তেওঁ কয়– যোৱা সময়ছোৱাত অসম আৰক্ষীয়ে ৰাজ্যত ড্রাগ্ছ আৰু এই ব্যৱসায়ৰ লগত জড়িত লোকসকলৰ বিৰুদ্ধে অভিযান চলাই বৃহৎ পৰিমাণৰ ড্রাগ্ছ জব্দ কৰাৰ সমান্তৰালকৈ বহু লোকক গ্রেপ্তাৰ কৰিছে৷ শূন্য সহনশীলতা নীতিৰে আৰক্ষীয়ে চলোৱা এই অভিযানে বহু পৰিয়াল তথা লোকক উপকৃত কৰিছে৷ একেদৰে চাহ অধ্যুষিত এলেকাসমূহত সুৰাৰ প্রচলন বন্ধ কৰাৰ বাবে আবকাৰী বিভাগ আৰু আৰক্ষীয়ে লোৱা ভূমিকাও যথেষ্ট প্রশংসনীয় হৈছে৷ সুৰাৰ ব্যৱহাৰ কেনেকৈ কমাব পাৰি, সেই সন্দর্ভতো ৰাজ্যপালগৰাকীয়ে আজি কেইবাটাও উপায় উল্লেখ কৰে৷