‘চৰণেহে জানে মৰণৰ ঠাই” বুলি কোৱা বাক্যষাৰি সত্য প্ৰমাণিত কৰি আজি চলন্ত বাছতে প্ৰাণ হেৰুৱালে এগৰাকী জ্যেষ্ঠ চিকিৎসকে I সঁচাই কোনেও নাজানে কাৰ মৰণ কেতিয়া আৰু ক’ত হ’ব! সেয়ে হয়তো চলি থকা বাছতে প্ৰাণ হেৰুৱালে এগৰাকী চিকিৎসকে l
গোৱালপাৰা জিলাৰ আগিয়া খণ্ড প্ৰাথমিক স্বাস্থ্যকেন্দ্ৰৰ চিকিৎসক ডাঃ ৰণ্টুমণি কাকতিয়ে (৫৭) বাছৰ ছিটতে মৃত্যুমুখত পৰা হৃদয়বিদাৰক ঘটনাই আগিয়া আৰু ৰংজুলি অঞ্চলত শোকৰ ছাঁ পেলায় l চিকিৎসকগৰাকীয়ে ঘৰৰ পৰা কৰ্মস্থলীলৈ গৈ থকা অৱস্থাত চলন্ত বাছতে অচেতন হৈ পৰেI ঘটনাৰ লগে লগে বাছৰ যাত্ৰী আৰু কৰ্মচাৰীসকলে চিকিৎসকগৰাকীক ৰংজুলি চিকিৎসালয়ত ভৰ্তি কৰায় যদিও চিকিৎসকে মৃত বুলি ঘোষণা কৰে l
জানিব পৰা মতে, মৃত চিকিৎসকগৰাকীৰ ঘৰ কামৰূপ জিলাৰ হাজো থানাৰ অন্তৰ্গত কুলহাটীৰ চেঁচামুখত I আজি পুৱা তেওঁ ঘৰৰ পৰা নিজ কৰ্মস্থলী আগিয়ালৈ ওলাই আহিছিল l চিকিৎসকগৰাকীয়ে এ এছ-০১ আৰ চি-৮৮৩৯ নম্বৰৰ “যাত্ৰা” নামৰ গুৱাহাটীৰ পৰা ধুবুৰী অভিমুখী বাছখনত জালুকবাৰীত উঠি আগিয়ালৈ গৈ আছিল I ১৭নং ৰাষ্ট্ৰীয় ঘাইপথেৰে ধূপধৰা পাৰ হোৱাৰ পিছতে ডাঃ ৰণ্টুমণি কাকতি হঠাৎ অচেতন হৈ পৰিছিল I সেই স্থানত তৎক্ষণাত পাব পৰাকৈ কোনো চিকিৎসালয় নথকাত বাছৰ যাত্ৰী আৰু কৰ্মচাৰীসকলে চিধাই ৰংজুলি চিকিৎসালয়লৈ লৈ আনি ভৰ্তি কৰাইছিল যদিও চিকিৎসকে মৃত বুলি ঘোষণা কৰে l
ৰংজুলি চিকিৎসালয়ৰ চিকিৎসক ডাঃ হৰগোবিন্দ নাথে জানিবলৈ দিয়া মতে, যিহেতু ‘ব্ৰথ ডেথ কেছ”, সেয়ে তাৎক্ষণিকভাৱে মৃত্যুৰ কাৰণ নিশ্চিত কৰিব পৰা নাযায় ! তথাপি হাৰ্ট এটেক বা ষ্ট্ৰোক হ’ব পাৰে বুলি অনুমানহে কৰিব পাৰি l অৱশ্যে মৰণোত্তৰ পৰীক্ষাৰ পিছত মৃত্যুৰ কাৰণ নিশ্চিত হ’ব I
ঘটনা সংক্ৰান্তত ৰংজুলি আৰক্ষীয়ে তদন্ত আৰম্ভ কৰিছে আৰু মৃতদেহ মৰণোত্তৰ পৰীক্ষাৰ বাবে গোৱালপাৰালৈ প্ৰেৰণৰ ব্যৱস্থা কৰে I এগৰাকী জ্যেষ্ঠ চিকিৎসকৰ আকস্মিক মৃত্যুৰ খবৰে গোৱালপাৰা জিলাতে শোকৰ ছাঁ পেলাইছে l
নিয়মীয়া বাৰ্তা, ৰংজুলি, ১৯ জানুৱাৰী :