কটকত দক্ষিণ আফ্ৰিকা বধ, বলাৰৰ ধুমুহাত তচনচ প্ৰটিয়াজ বাহিনী

ঘৰুৱা দল টীম ইণ্ডিয়াই সহজ জয়েৰে টি–২০ শৃংখলাত অভিযান আৰম্ভ কৰিছে৷ কটকত অনুষ্ঠিত মেচখনত ভাৰতে দক্ষিণ আফ্রিকাক ১০১ ৰানত পৰাস্ত কৰি পাঁচখনীয়া মেচৰ শৃংখলাটোত ১–০ত অগ্রগতি লাভ কৰিছে৷

মেচখনত টীম ইণ্ডিয়াই জয়ৰ বাবে বান্ধি দিয়া ১৭৬ ৰানৰ লক্ষ্য অনুসৰণ কৰিবলৈ আহি বেটিং বিপর্যয়ৰ সন্মুখীন হৈ প্রটিয়াজ বাহিনীয়ে ১২.৩ অভাৰত মাত্র ৭৪ ৰানহে কৰে৷ দেৱাল্ড ব্রেভিছে সর্বাধিক ২২ ৰান কৰে৷

দলটোৰ মাত্র ৪গৰাকী বেটাৰে দহকৰ ঘৰ স্পর্শ কৰে৷ ভাৰতৰ হৈ অর্শদীপ, বুমৰাহ, বৰুণ আৰু অক্ষৰে দুটাকৈ, হার্দিক আৰু শিৱমে এটাকৈ উইকেট লয়৷ ইয়াৰ পূর্বে প্রথমে বেটিং কৰিবলৈ আহি প্রাৰম্ভিক বিপর্যয় সত্ত্বেও হার্দিক পাণ্ডিয়াৰ বিস্ফোৰক অপৰাজিত অর্ধশতকৰ সহায়ত টীম ইণ্ডিয়াই নির্ধাৰিত ২০ অভাৰত ৬টা উইকেট হেৰুৱাই ১৭৫ ৰান সংগ্রহ কৰে৷

ইনিংছ আৰম্ভণি সুখকৰ নাছিল ঘৰুৱা দলটোৰ৷ দলীয় স্ক’ৰ ৪৮ ৰানতে তিনিজনকৈ আগশাৰীৰ বেটাৰক হেৰুৱাই দলটো বিপদত পৰিছিল৷ আঘাতৰ পৰা সুস্থ হৈ প্রত্যাৱর্তন কৰা শুভমন গিলে মাত্র ৪ ৰান কৰাৰ বিপৰীতে অভিষেক শর্মাই ১৭ আৰু অধিনায়ক সূর্যকুমাৰ যাদৱে ১২ ৰান কৰে৷

অৱশ্যে তিলক বার্মাই অক্ষৰ পেটেলৰ সৈতে লগ লাগি চতুর্থ উইকেটত ৩০ ৰান সংগ্রহ কৰি দলৰ বিপর্যয় কিছু ৰোধ কৰে৷ তিলকে ২৬ আৰু অক্ষৰে ২৩ ৰান কৰি বিদায় লয়৷ হার্দিকে মাত্র ২৮টা বলত ৬টা চাৰি আৰু ৪টা ছয়েৰে অপৰাজিতভাৱে ৫৯ ৰান সংগ্রহ কৰি দলক সন্তোষজনক স্থিতিত উপনীত কৰায়৷ শিৱম ডুবেই ১০ আৰু জিতেশ শর্মাই অপৰাজিত ১০ ৰান কৰে৷ দক্ষিণ আফ্রিকাৰ হৈ এনগিৰিয়ে সর্বাধিক ৩টা উইকেট লয়৷

ডিজিটেল ডেস্ক, ১০ ডিচেম্বৰ