গুৱাহাটী বিশ্ববিদ্যালয়ত উত্তৰ-পূবৰ মহাবিদ্যালয়ৰ অধ্যক্ষসকলৰ বাবে নেতৃত্ব আৰু ক্ষমতা বিকাশৰ ওপৰত কৰ্মশালা

নিয়মীয়া বাৰ্তা, ২১ মাৰ্চ: কালিৰে পৰা ২৪ মাৰ্চ পৰ্যন্ত গুৱাহাটী বিশ্ববিদ্যালয়ত ইউজিচি-এইচআৰডিচিৰ সহযোগত নতুন দিল্লীৰ ৰাষ্ট্ৰীয় শৈক্ষিক পৰিকল্পনা আৰু প্ৰশাসন প্ৰতিষ্ঠানৰ উচ্চ আৰু পেছাদাৰী শিক্ষা বিভাগে উত্তৰ-পূব ভাৰতৰ মহাবিদ্যালয়ৰ অধ্যক্ষসকলৰ নেতৃত্ব আৰু ক্ষমতা বিকাশৰ ওপৰত এক পাঁচদিনীয়া অভিমুখীকৰণ তথা ক্ষমতা বিকাশৰ এক কৰ্মশালা আয়োজন কৰিছে।

ৰাজীৱ গান্ধী বিশ্ববিদ্যালয়ৰ প্ৰাক্তন উপাচাৰ্য অধ্যাপক অতুল শৰ্মাই NEP 2020ৰ পৰিপ্ৰেক্ষিতত শৈক্ষিক নেতাসকলৰ ভূমিকা” সন্দৰ্ভত কালি অনুষ্ঠিত উদ্বোধনী অনুষ্ঠানৰ উদ্বোধনী ভাষণ প্ৰদান কৰে। অনুষ্ঠানটোৰ উদ্বোধনী অধিৱেশনত গুৱাহাটীৰ গুৱাহাটী বিশ্ববিদ্যালয়ৰ উপাচাৰ্য অধ্যাপক প্ৰতাপ জ্যোতি সন্দিকৈয়ে সভাপতিত্ব কৰে।
অধ্যাপক সন্দিকৈয়ে সাধাৰণতে দেশত আৰু বিশেষকৈ উত্তৰ-পূৰ্বাঞ্চলত NEP 2020 ৰূপায়ণত শৈক্ষিক প্ৰশাসকৰ ভূমিকাৰ ওপৰত গুৰুত্ব আৰোপ কৰে। উল্লেখ্য যে, এই কাৰ্যসূচীত উত্তৰ-পূবৰ ৰাজ্যসমূহৰ ১১ খন বিশ্ববিদ্যালয়ৰ ৩২ জন মহাবিদ্যালয়ৰ অধ্যক্ষই অংশগ্ৰহণ কৰিছে যাৰ যুটীয়া সমন্বয়কৰ দায়িত্বত আছে এন.আই.ই.পি.এ.ৰ ড০ সংগীতা আংগোম, অধ্যাপক নীৰু স্নেহি আৰু গুৱাহাটী বিশ্ববিদ্যালয়ৰ এইচআৰডিচিৰ সঞ্চালক অধ্যাপক পাৰ্থ প্ৰতিম বৰুৱা।

মন কৰিবলগীয়া যে, এই কাৰ্যসূচীৰ লক্ষ্য হৈছে উত্তৰ-পূব অঞ্চলত স্নাতক শিক্ষাৰ বিষয় আৰু প্ৰত্যাহ্বানৰ ওপৰত নিৰ্দিষ্ট গুৰুত্ব দি NEP 2020 ৰূপায়ণৰ বাবে নেতৃত্বৰ ক্ষমতা গঢ়ি তোলা। ৰাষ্ট্ৰীয় পৰ্যায়ৰ বিশেষজ্ঞ যেনে এন.আই.ই.পি.এ.ৰ ভাৰপ্ৰাপ্ত উপাচাৰ্য অধ্যাপক সুধাংশু ভূষণ, এছ.ই.ই.ডি.ৰ অধ্যাপক জি. ডি. শৰ্মা, এন.আই.ই.পি.এ.-ৰ অধ্যাপক আৰতি শ্ৰীবাস্তৱ, নৰ্থ ইষ্টাৰ্ণ হিল বিশ্ববিদ্যালয়ৰ অধ্যাপক অম্বিকা পাট আৰু গুৱাহাটী বিশ্ববিদ্যালয়ৰ অধ্যাপক উৎপল শৰ্মাই অংশগ্ৰহণকাৰীসকলৰ সৈতে সমল ব্যক্তি হিচাপে বাৰ্তালাপ কৰিব।