বিশেষ বাৰ্তা, ৩ ডিচেম্বৰঃ মধ্যপ্রদেশত অভাৱনীয় বিজয় শাসকীয় বিজেপিৰ৷ কংগ্রেছক শোচনীয়ভাৱে পৰাজিত কৰি একপক্ষীয়ভাৱে বিজেপিয়ে নির্বাচনী ফলাফলত বিজয় সাব্যস্ত কৰি পুনৰ গাদী দখল কৰিলে৷ পুৱাৰ ভাগত কংগ্রেছ আৰু শাসকীয় বিজেপিৰ মাজত প্রথম দুঘণ্টামান প্রতিদ্বন্দ্বিতা তীব্র হৈ উঠে যদিও পাছলৈ শাসকীয় বিজেপিয়ে অগ্রগতি লাভ কৰিবলৈ সক্ষম হয়৷ অৱশেষত নিৰংকুশ সংখ্যাগৰিষ্ঠতা লাভ কৰাৰ আসন নিশ্চিত কৰে৷ ২৩০জনীয়া বিধানসভাৰ ১৬৩খন আসনত অগ্রগতি লাভ কৰি থাকি চৰকাৰ গঠনৰ বাবে প্রয়োজনীয় মেজিক সংখ্যা অতিক্রম কৰে৷ অগ্রগতি লাভ কৰি থকা আসনৰ ভিতৰত ইতিমধ্যে ৯১খন আসনত জয়লাভ কৰিছে৷ বাকী অগ্রগতি লাভ কৰি থকা ৭২খন আসনতো জয় প্রায় নিশ্চিত হৈছে৷ কংগ্রেছে মাত্র ৬৬খন আসনত অগ্রগতি লাভ কৰি আছে৷ ইয়াৰে ভিতৰত ইতিমধ্যে ২৫খন আসনত দলটোৱে জয়লাভ কৰিছে আৰু বাকী ৪১খন আসনত প্রতিদ্বন্দ্বীতকৈ বৃহৎ ব্যৱধানত অগ্রগতি লৈ আছে৷ সন্ধিয়া ৭.৩০ বজাত নির্বাচন আয়োগে প্রকাশ কৰা তথ্য অনুসৰি বিজেপিয়ে ৯১খনত জয়লাভ কৰাৰ বিপৰীতে কংগ্রেছে ২৫খনত জয়লাভ কৰিছে৷ ভাৰত আদিবাসী পার্টীয়ে এখন আসন লাভ কৰিছে৷ উল্লেখ্য যে চাৰিবাৰৰ মুখ্যমন্ত্রী তথা বিজেপিৰ জ্যেষ্ঠ নেতা শিৱৰাজ সিং চৌহানে আজি ঘোষিত ফলাফলত বৃহৎ ভোটৰ ব্যৱধানত জয়লাভ কৰিবলৈ সক্ষম হৈছে৷ তেৱেঁই ৰাজ্যখনৰ পৰৱর্তী মুখ্যমন্ত্রী হোৱাটো প্রায় নিশ্চিত৷
#বাৰ্তা ডেস্ক