বাৰ্তা ডিজিটেল ডেস্ক, ২১ ডিচেম্বৰঃ মঙলবাৰে আই পি এল-২০২৪ৰ বাবে অনুষ্ঠিত নিলামত অভিলেখ ভংগকাৰী মূল্যত বিক্ৰী হৈছিল মিচেল ষ্টাৰ্ক আৰু পেট কামিন্স। কলকাতা নাইট ৰাইডাৰ্ছে মিচেল ষ্টাৰ্কক ২৪.৭৫ কোটি টকাত ক্ৰয় কৰাৰ বিপৰীতে ছানৰাইজাৰ্ছ হায়দৰাবাদে পেট কামিন্সক ২০.৫০ কোটি টকাত কিনে। এই বৃহৎ মূল্যৰ সৈতে এই দুয়োগৰাকী খেলুৱৈয়েই আই পি এলৰ ইতিহাসৰ আটাইতকৈ দামী খেলুৱৈ হিচাপেও পৰিগণিত হয়। আই পি এলৰ শেষৰ ছিজনটো মাজভাগত এৰি পেট কামিন্স ঘৰলৈ গৈছিল। আনহাতে, মিচেল ষ্টাৰ্কৰ বাবে কেতিয়াও আই পি এল অগ্ৰাধিকাৰৰ বিষয় নহয়। এই কাৰণেই তেওঁ বহুদিনৰ মূৰত আই পি এললৈ ঘূৰি আহিছে। এই দুগৰাকী খেলুৱৈৰ অগ্ৰাধিকাৰ সদায় অষ্ট্ৰেলিয়াৰ দলটোৱেই হৈ আহিছে। তাৰ পিছত মিচেল ষ্টাৰ্কো কেইবাবাৰো আঘাতপ্ৰাপ্ত হৈ আহিছে। এনে পৰিস্থিতিত প্ৰশ্ন উত্থাপন হয় যে যদি এই দুজন ব্যয়বহুল খেলুৱৈ টুৰ্ণামেণ্টৰ মাজভাগত আঘাতপ্ৰাপ্ত হয় বা উপলব্ধ নহয়, তেতিয়াও ফ্ৰেঞ্চাইজিয়ে তেওঁলোকক ইমান দৰমহা দিবনে? আই পি এলত খেলুৱৈক দৰমহা দিয়াৰ নিয়ম অতি স্পষ্ট। অৰ্থাৎ আই পি এলৰ এটা ছিজনৰ বাবে যদি কোনো খেলুৱৈ পূৰ্ণকালীনভাৱে উপলব্ধ হয়, তেন্তে ফ্ৰেঞ্চাইজিয়ে তেওঁক এখন মেচতো সুযোগ নিদিলেও তেওঁক গোটেই ছিজনটোৰ বাবে দৰমহা দিব লাগিব। কিন্তু যদি কোনো খেলুৱৈ টুৰ্ণামেণ্টৰ মাজভাগত ব্যক্তিগত কাৰণত মেচসমূহত উপলব্ধ নহয় বা আঘাতপ্ৰাপ্ত হয়, তেন্তে তেওঁ যি মেচৰ বাবে উপলব্ধ আছিল সেই সংখ্যাৰ বাবে একে দৰমহা পায়। এনে পৰিস্থিতিত যদি আই পি এলৰ ছিজনৰ মাজভাগত কামিন্স আৰু ষ্টাৰ্ক আঘাতপ্ৰাপ্ত হয় বা আন কোনো কাৰণত উপলব্ধ নহয়, তেন্তে তেওঁলোকে এটা ছিজনৰ মেচত উপলব্ধতাৰ অনুপাতে ধন লাভ কৰিব। একেদৰে আই পি এলৰ ছিজন আৰম্ভ হোৱাৰ আগতে যদি কোনো খেলুৱৈ আঘাতপ্ৰাপ্ত হয় বা উপলব্ধ নহয়, তেন্তে তেওঁক এটকাও দিয়াটো ফ্ৰেঞ্চাইজিৰ বাবে বাধ্যতামূলক নহয়। এনে সময়ত ফ্ৰেঞ্চাইজিয়ে সেই খেলুৱৈজনৰ ঠাইত আন এজন খেলুৱৈকো ল’ব পাৰে।