নিয়মীয়া বাৰ্তা ডিজিটেল, ১১ নৱেম্বৰঃ বিহাৰৰ বেগুচৰাইত মর্মান্তিক দুর্ঘটনা চহৰখনৰ বাৰাউনি ষ্টেচনত কালি ৰে’ল ইঞ্জিন আৰু দবাৰ মাজৰ কাপলিং খুলিবলৈ গৈ মৃত্যু হৈছে ২৫ বছৰৰ এজন যুৱক৷ ৰে’ল কর্মী যুৱকজনৰ নাম অমৰ কুমাৰ৷ অমৰ ৰে’লৰ পইণ্টছমেন আছিল৷ ইঞ্জিন আৰু দবাৰ মাজৰ কাপলিং খোলাই তেওঁৰ কাম৷ কালিও তেওঁ এই কাম কৰিবলৈ গৈছিল৷ কিন্তু কাপলিং খোলাৰ বাবে যেতিয়া তেওঁ ইঞ্জিন আৰু দবাৰ মাজৰ খালী স্থানত প্রৱেশ কৰিছে, সেই সময়তে ইঞ্জিনটোৱে পিছফালৰ পৰা তেওঁক হেঁচি ধৰে৷ ফলত দবাৰ সৈতে ৰে’ল কর্মীজনৰ দেহ থেতেলা হৈ যায়৷ প্রাথমিকভাৱে ৰে’লৰ ৫গৰাকী বিষয়াই এই ঘটনাৰ তদন্ত কৰিছে৷ তদন্ত অনুসৰি ২ সহকর্মীৰ ভুল বুজাবুজিৰ বাবে তৃতীয় কর্মী অমৰৰ মৃত্যু হৈছে৷ ইতিমধ্যে এই ঘটনাৰ আলোকচিত্রই দেশজুৰি শিহৰণৰ সৃষ্টি কৰিছে৷ এই ঘটনাক লৈ উচ্চ পর্যায়ৰ তদন্তৰ নির্দেশ দিছে ৰে’ল বিভাগে৷