ঋণত ডুবি থকা পাকিস্তানৰ ৪৫ শতাংশই দৰিদ্র, ভিক্ষাৰী ৰাষ্ট্রত পৰিণত চিৰবৈৰী দেশ

সন্ত্রাসবাদ আৰু ধর্মীয় উন্মাদনাত ডুব গৈ থকা পাকিস্তান ঋণৰ ওপৰতে জীয়াই থকা বুলি ক’লেও অত্যুক্তি কৰা নহ’ব৷ ২০২৫ বর্ষত দেশখনৰ ঋণৰ পৰিমাণ ২৮৬.৮৩ বিলিয়ন মার্কিন ডলাৰলৈ বৃদ্ধি পাইছে৷ ভাৰতীয় মুদ্রাৰ হিচাপত এই পৰিমাণ ২৫ লাখ ১৯ হাজাৰ কোটি টকাতকৈও অধিক ৷ যোৱা বিত্তীয় বর্ষৰ তুলনাত চলিত বর্ষত দেশখনৰ ঋণৰ পৰিমাণ ১৩ শতাংশ বৃদ্ধি পাইছে৷ এক কথাত ইছলামাবাদে প্রকাশ কৰা চৰকাৰী তথ্য মতেই ভিক্ষাৰী ৰাষ্ট্রত পৰিণত হৈছে পাকিস্তান৷

দেশখনৰ বিত্ত মন্ত্রালয়ে প্রকাশ কৰা তথ্য মতে, ২৫ জুনলৈকে পাকিস্তানৰ মুঠ চৰকাৰী ঋণ ৮০.৬ ত্রিলিয়ন পাকিস্তানী টকালৈ বৃদ্ধি পাইছে৷ ইয়াৰে ঘৰুৱা ঋণ ৫৪.৫ ত্রিলিয়ন আৰু বিদেশী ঋণ ২৬ ত্রিলিয়ন ঋণ আৰু জিডিপিৰ অনুপাতো পূর্বৰ তুলনাত অধিক বৃদ্ধি পাইছে৷ ২০২৪ চনৰ জুন মাহত ৬৮ শতাংশ চৰকাৰী ঋণ বৃদ্ধিৰ হাৰ চলিত বর্ষৰ জুন মাহত ৭০ শতাংশলৈ বৃদ্ধি পাইছে৷

বিশেষজ্ঞসকলে কয় যে এই বৃহৎ পৰিমাণৰ ঋণ পাকিস্তানৰ অর্থনীতিৰ বাবে এক ভয়ংকৰ বিপদ৷ যদিহে এই ঋণ আৰু সুদৰ বোজা নিৰীক্ষণ কৰা নহয় তেতিয়াহ’লে অনাগত দিনত পাকিস্তানৰ কোষাগাৰ বহু পৰিমাণে ক্ষতিগ্রস্ত হ’ব৷

বিশ্ববেংকৰ প্রতিবেদন অনুসৰি, পাকিস্তানৰ জনসংখ্যাৰ ৪৫ শতাংশই দৰিদ্র৷ তদুপৰি ১৬ শতাংশ লোক ইমানেই দৰিদ্র যে তেওঁলোকৰ দুবেলা–দুসাঁজ খোৱাৰো সামর্থ্য নাই৷

ডিজিটেল ডেস্ক, ২৭ অক্টোবৰ