নিয়মীয়া বাৰ্তা ১০ ছেপ্টেম্বৰঃ মহামাৰী ক’ৰোনা ভাইৰাছৰ প্রাদুর্ভাৱৰ বাবে ২০২১লৈ স্থগিত হোৱা টকিঅ’ অলিম্পিক যিকোনো মূল্যৰ বিনিময়ত আয়োজন কৰিব জাপান চৰকাৰে৷ মহামাৰীৰ পিছত সন্মুখীন হ’বলগীয়া ভয়াৱহ প্রত্যাহ্বান নেওচি হ’লেও দেশখনে বিশ্বৰ হাজাৰ হাজাৰ ক্রীড়াবিদৰ সুবিধাৰ প্রতি লক্ষ্য ৰাখি অহা বর্ষত অলিম্পিক আয়োজন কৰিবলৈ সংকল্পবদ্ধ৷ এই কথা ঘোষণা কৰিছে জাপানৰ ক্রীড়ামন্ত্রী ছেইকো হাছিম’ট’ৱে৷
এখন সংবাদ মেলত তেওঁ কয় যে অহা বর্ষত অলিম্পিক সফলতাৰে আয়োজন কৰিবলৈ পূর্ণগতিৰে প্রস্তুতি চলি আছে৷ বিশ্বৰ হাজাৰ হাজাৰ ক্রীড়াবিদে যাতে অলিম্পিকক লৈ অনিশ্চয়তাৰ সন্মুখীন হ’বলগীয়া নহয়, সেয়া নিশ্চিত কৰিবলৈ জাপান চৰকাৰে যিকোনো প্রকাৰে অলিম্পিক আয়োজন কৰিবলৈ দৃঢ়বদ্ধ৷ ইয়াৰ পূর্বে টকি’ অলিম্পিকৰ স্থানীয় উদ্যোক্তা কমিটীয়েও ২০২১ৰ অলিম্পিক সময়মতে অনুষ্ঠিত হ’ব বুলি যোৱা সপ্তাহত ঘোষণা কৰিছিল৷
মন কৰিবলগীয়া যে পূর্বনির্ধাৰিত সূচী অনুসৰি টকি’ অলিম্পিক ২০২০ৰ জুলাইত অনুষ্ঠিত হোৱাৰ কথা আছিল৷ কিন্তু মহামাৰীৰ প্রাদুর্ভাৱৰ বাবে আন্তঃৰাষ্ট্রীয় অলিম্পিক কমিটী আৰু জাপান চৰকাৰে যোৱা মার্চ মাহত বিশ্বৰ সর্ববৃহৎ ক্রীড়া মহোৎসৱ এবছৰলৈ স্থগিত ৰাখে৷