নিয়মীয়া বাৰ্তা, ১১ ছেপ্টেম্বৰঃ ক’ৰোনাৰ আতংকৰ মাজতে নিউয়র্কত চলি থকা ইউ এছ অ’পেন টেনিছ প্রতিযোগিতাৰ মহিলা শাখাৰ ছিংগলছৰ ছেমিফাইনেলত ছয়বাৰৰ চেম্পিয়ন ছেৰেনা উইলিয়ামছে বেলাৰুছৰ ভিক্টোৰিয়া আজাৰেংকাৰে প্রতিদ্বন্দ্বিতা আগবঢ়াব৷
বুধবাৰে নিশা অনুষ্ঠিত কোৱার্টাৰ ফাইনেল মেচ এখনত তৃতীয় বাছনিপ্রাপ্ত ছেৰেনাই বুলগেৰিয়াৰ ছেভেটানা পিৰনক’ভাক কিছু সংগ্রামৰ মূৰত ৪–৬, ৬–৩, ৬–২ ছেটত পৰাস্ত কৰি অন্তিম চাৰিলৈ উন্নীত হয়৷ ইপিনে, আন এখন কোৱার্টাৰ ফাইনেলত আজাৰেংকাই ষষ্ঠদশ বাছনিৰ বেলজিয়ামৰ এলিজ মার্টেনছক সহজেই ৬–১, ৬–০ ছেটত পৰাস্ত কৰে৷
মন কৰিবলগীয়া যে মহিলাৰ ছিংগলছৰ দ্বিতীয়খন ছেমিত চতুর্থ বাছনিৰ অ’ছাকাই জেনিফাৰ ব্রেডিৰে প্রতিদ্বন্দ্বিতা আগবঢ়াব৷ ইফালে, পুৰুষ শাখাৰ ছিংগলছৰ অন্তিম চাৰিত স্থান সুৰক্ষিত কৰিছে দ্বিতীয় বাছনিপ্রাপ্ত অষ্ট্রিয়াৰ ডমিনিকি থিম আৰু তৃতীয় বাছনিৰ ৰাছিয়াৰ ডানিল মেডভেডেভে৷ আর্থুৰ এছ ষ্টেডিয়ামত অনুষ্ঠিত কোৱার্টাৰ ফাইনেল মেচ এখনত ডমিনিকে অষ্ট্রেলিয়াৰ এলেক্স ডি মিনাউৰক পোনপটীয়াকৈ ৬–১, ৬–২, ৬–৪ ছেটত পৰাস্ত কৰে৷
ছেমিত ডমিনিকে মেডভেডেভৰে মুখামুখি হ’ব৷ আন এখন কোৱার্টাৰ ফাইনেলত মেডভেডেভে বাল্যকালৰ বন্ধু আন্দ্রে ৰুবলেভক সংগ্রামৰ মূৰত ৭–৬ (৬), ৬–৩, ৭–৬ (৫) ছেটত পৰাস্ত কৰে৷