নিয়মীয়া বাৰ্তা, ২৭ ছেপ্টেম্বৰঃ দুর্দান্ত জয়েৰে আই পি এলত সুন্দৰ আৰম্ভণি ঘটোৱা ৰাজস্থান ৰয়েলছে কাইলৈ শক্তিশালী কিংছ একাদশ পঞ্জাবৰ মুখামুখি হ’ব৷ ষ্টিভেন স্মিথ নেতৃত্বাধীন দলটোৱে প্রতিযোগিতাৰ প্রথমখন মেচত মহেন্দ্র সিং ধোনীৰ চেন্নাই ছুপাৰ কিংছক হৰুৱাই আত্মবিশ্বাসী হৈ থকাৰ বিপৰীতে কিংছ একাদশ পঞ্জাবে ক্রমাগত দুখন মেচত জয়েৰে শক্তিৰ পৰিচয় দিবলৈ সক্ষম হৈছে৷ চেন্নাইৰ বিৰুদ্ধে বিস্ফোৰক ৰূপ ধাৰণ কৰা ৰাজস্থানৰ যুৱ তাৰকা সঞ্জু ছেমছনক প্রতিহত কৰাটো কিংছ একাদশ পঞ্জাবৰ বাবে যিদৰে প্রত্যাহ্বানজনক হ’ব, একেদৰে দুর্দান্ত ফর্মত থকা লোকেশ ৰাহুলক নিয়ন্ত্রণ ৰখাটো স্মিথ বাহিনীৰ বাবে অগ্ণিপৰীক্ষাস্বৰূপ হ’ব৷
উল্লেখ্য যে শেহতীয়া মেচখনত সঞ্জু ছেমছনে মাত্র ৩২ বলত ৭৪ ৰানৰ আকর্ষণীয় ইনিংছ খেলি ক্রিকেট অনুৰাগীৰ মন জয় কৰিছিল৷ একেদৰে ৰয়েল চেলেঞ্জার্ছ বাংগালুৰুৰ বিৰুদ্ধে শেহতীয়া মেচখনত পঞ্জাবৰ অধিনায়ক লোকেশ ৰাহুলে ৬৯ বলত অপৰাজিতভাৱে ১৩২ ৰানৰ বিস্ফোৰক ইনিংছ খেলি দলক স্মৰণীয় জয়ৰ সোৱাদ দিছিল৷ ৰাহুলৰ লগতে দলটোত আছে মায়ংক আগৰৱাল, গ্লেন মেক্সৱেল, কৰুণ নায়াৰ, শ্বৰফৰাজ খান আদিৰ দৰে কেইবাগৰাকীও আক্রমণাত্মক বেটছমেন৷ একেদৰে, ৰাজস্থানৰ শিবিৰত আছে অধিনায়ক স্মিথ, জ’ছ বাটলাৰ, সঞ্জু ছেমছন, ৰবীন উথাপ্পা আৰু ৰিয়ান পৰাগৰ দৰে বিস্ফোৰক বেটছমেন৷ দুয়োটা দলতে কেইবাগৰাকীও বিগ হিটাৰ উপস্থিত থকাৰ প্রতি লক্ষ্য ৰাখি শ্বাৰজাহত কাইলৈ পুনৰ এবাৰ ৰানৰ জোৱাৰ উঠাৰ সম্ভাৱনা আছে৷
বলিঙত ৰাজস্থান ৰয়েলছে ইংলেণ্ডৰ তাৰকা বেগী বলাৰ জ’ফ্রা আর্চাৰৰ ওপৰত নির্ভৰশীল হ’ব৷ একেদৰে, পঞ্জাবৰ বাবে মূল ভৰসা হ’ব ছেল্ডন কট্রেল আৰু মহম্মদ ছামি৷ প্রথমখন মেচত ব্যর্থ হোৱা অসম সন্তান ৰিয়ান পৰাগৰ ওপৰতো কাইলৈ ক্রিকেটপ্রেমীৰ দৃষ্টি নিবদ্ধ থাকিব৷
খেলৰ সময়: সন্ধিয়া ৭.৩০ বজা৷