নিয়মীয়া বাৰ্তা ১৩ অক্টোবৰঃ ছ’চিয়েল মিডিয়াযোগে কট্টৰ ইছলামিক ধর্মীয় ধাৰণা প্রসাৰিত কৰি থকা সন্ত্রাসবাদী সংগঠনৰ ম’বাইল এপ গুগ্ল প্লে ষ্টোৰত সক্রিয় হৈ থকাৰ ভয়াৱহ তথ্য পোহৰলৈ আহিছে৷ পাকিস্তানস্থিত নিষিদ্ধঘোষিত সন্ত্রাসবাদী সংগঠন জইচ–ই–মহম্মদৰ সম্পর্কিত ম’বাইল এপ এটি গুগ্ল প্লে ষ্টোৰত অতি সক্রিয় হৈ থকাৰ চাঞ্চল্যকৰ তথ্য প্রকাশ পাইছে৷ তথ্য মতে বিশ্বজুৰি এনড্রয়ড ফোন ব্যৱহাৰকাৰীৰ কাৰণে গুগ্ল প্লে ষ্টোৰত জইচ–ই–মহম্মদৰ ম’বাইল এপ সক্রিয় হৈ আছে৷ এই সক্রিয় ম’বাইল এপটোৰে জইচ–ই–মহম্মদে সংগঠনটোৰ সাংগঠনিক স্থিতিকে ধৰি বিভিন্ন কার্যকলাপ চলাই আছে৷ গুগল প্লে ষ্টোৰত ম’বাইল এপটোৰ নাম ‘আচলি বাটেন’৷
এই এপটোত জইচ–ই–মহম্মদৰ মুৰব্বী তথা ৰাষ্ট্রসংঘৰ ঘোষিত ৱাণ্টেড সন্ত্রাসবাদী মৌলানা মাছুদ আজহাৰৰ অডিঅ’ বার্তাকে ধৰি বিভিন্ন তথ্য প্রচাৰ কৰি থকা হৈছে৷ তদুপৰি নিষিদ্ধ সংগঠনটোৰ আন শীর্ষ সন্ত্রাসবাদীৰো কার্যকলাপ প্রচাৰ চলাই থকা হৈছে৷ তথ্য মতে ২০২০ চনৰ চাৰি ডিচেম্বৰত গুগ্ল প্লে ষ্টোৰত এই এপটো মুকলি কৰা হৈছে আৰু তেতিয়াৰে পৰা ম’বাইল এপটো পাঁচ সহস্রাধিক ডাউনলোড কৰা হৈছে৷ পাকিস্তানৰ পৰা বিভিন্ন ইছলামিক মৌলবীয়ে এই এপটোৰ যোগেদি ধর্মীয় গোড়ামি, বার্তা আদি প্রচাৰ কৰি আহিছে৷
এপটোৰ ৱেব পেজত মাছুদ আজহাৰৰ উচটনিমূলক লেখা প্রচাৰ কৰি থকা হৈছে৷ ছাদি উপ নামেৰে মাছুদ আজহাৰৰ বিভিন্ন কট্টৰ ধর্মীয় লেখা প্রচাৰ কৰা হৈছে৷ লক্ষণীয় যে ২০০১ চনৰ পৰা ২০১৯ চনলৈকে মাছুদ আজহাৰে ৰেকর্ড কৰা অনেক অডি’ বার্তা এপটোৰ পেজত সন্নিৱিষ্ট কৰা হৈছে৷ জার্মানীৰ ছার্ভাৰৰ পৰা এই এপটো সক্রিয় কৰি ৰখা হৈছে বুলিও তথ্যত প্রকাশ পাইছে৷ গুগ্ল প্লে ষ্টোৰত নিষিদ্ধ সন্ত্রাসবাদী সংগঠন জইচ–ই–মহম্মদৰ সক্রিয় হৈ থকাটো বিশ্ববাসীৰ বাবে এক অশনি সংকেত৷