সুদীর্ঘ ৫০ বছৰৰ পাছত মণিপুৰৰ উখৰুলত থুইংগালেং মুইভা

সুদীর্ঘ ৫০ বছৰৰ মূৰত জন্মভূমি উখৰুলত উপস্থিত হ’ল উত্তৰ–পূবৰ বিদ্রোহী সংগঠনৰ আটাইতকৈ বর্ষীয়ান নেতা থুইংগালেং মুইভা৷ নগাৰ সার্বভৌমত্বৰ দাবীৰে দীর্ঘদশক ধৰি সশস্ত্র সংগ্রাম অব্যাহত ৰখাৰ পাছত যুদ্ধবিৰতি চুক্তিৰে আলোচনাৰ মেজলৈ অহা এনএছচিএন–আইএমৰ মুৰব্বী হিচাপে পৰিচিত থুইংগালেং মুইভাৰ এই আগমনত উছৱমুখৰ পৰিৱেশ সৃষ্টি হ’ল উখৰুল আৰু সোমদলত৷

উল্লেখ্য যে ২০২৩ চনৰ মে’ মাহৰ পৰা গোষ্ঠীগত সংঘর্ষত জুৰুলা হৈ পৰা মণিপুৰৰ উখৰুলত মুইভাৰ এই আগমন বিশেষ উল্লেখযোগ্য ঘটনা হিচাপে পৰিগণিত হৈছে৷ শতবর্ষ গৰকিবলৈ কিছু বছৰ বাকী থকা মুইভাই এই ভ্রমণকালতে নিজৰ জন্মগাঁও সোমদলত কটাব এসপ্তাহ৷ ডিমাপুৰৰ পৰা আজি হেলিকপ্ঢাৰেৰে আহি উখৰুলত উপস্থিত হোৱা থুইংগালেং মুইভাক উষ্ম আদৰণি জনোৱা হয়৷

প্রায় ৫০ বছৰৰ পিছত প্রিয় নেতাগৰাকীক চাবলৈ আজি উখৰুলৰ টাংখুল লংগ্রাউণ্ড জনাকীর্ণ হৈ পৰে৷ ৰাজকীয়ভাৱে আদৰণি জনোৱা মুইভাৰ এই আগমনক নেতাৰ প্রত্যাৱর্তন বুলিয়েই ব্যাখ্যা কৰিছে স্থানীয় বাসিন্দাসকলে৷ সম্পূর্ণ পৰম্পৰাগতভাৱে আদৰণি জনোৱা মুইভাক শিৰত পিন্ধাই দিয়া হ’ল ৰাজকীয় মুকুট৷

৯০ বছৰ গৰকা মুইভাৰ শৰীৰ এতিয়া থৰক–বৰক৷ নগা সশস্ত্র সংগ্রামী ফিজো, শ্বু, খাপলাঙৰ পাছত জীৱিত অৱস্থাত থকা থুইংগালেং মুইভাই হৈছে উত্তৰ–পূর্বাঞ্চলৰ বিদ্রোহী সংগঠনসমূহৰ ভিতৰত আটাইতকৈ বর্ষীয়ান নেতা৷ এনএছচিএন–আইএম গোটক নেতৃত্ব দি অহা মুইভা হ’ল সংগঠনটোৰ সাধাৰণ সম্পাদক তথা এনএছচিএন (আইএম)ৰ প্রস্তাৱিত নাগালিমৰ তেৱেঁই হ’ল প্রধানমন্ত্রী৷

জন্মসূত্রে নাগালেণ্ডৰ নগা নহয় যদিও মণিপুৰৰ উখৰুল জিলাৰ সোমদলত ১৯৩৪ চনৰ ১৩ মার্চত জন্মলাভ কৰা মুইভা এজন টাংখুল নগা৷

লক্ষণীয়ভাৱে নাগালেণ্ডৰ ১৪টা স্বীকৃতজনজাতিৰ তালিকাত নাই এই টাংখুল নগা৷ তথাপি স্বাধীন–সার্বভৌম নাগালিমৰ দাবীৰে সশস্ত্র সংগ্রামেৰে ওৰেজীৱন পাৰ কৰিলে মুইভাই৷ যাৰ বাবে এতিয়াও মুইভা এনএছচিএন–আইএমৰ অবিসম্বাদী নেতা৷ ১৯৯৭ চনত যুদ্ধবিৰতি ঘোষণা কৰাৰ পাছত ২০১৫ চনত এনএছচিএন–আইএমে স্বাক্ষৰিত কৰে নগা ফ্রেমৰ এগ্রিমেণ্ট৷ সেই শান্তি চুক্তিক লৈয়েই ইখনৰ পাছত সিখন আলোচনাত অংশগ্রহণ কৰি আহিছে মুইভাই৷

সশস্ত্র সংগ্রামৰ এই কার্যসূচীত ব্যস্ত থকা মুইভাই বিগত ৫০ বছৰেই অহা নাছিল নিজৰ ওপজা ভূমি সোমদললৈ৷ সেই অপেক্ষাৰ অন্ত পেলাই আজি এনএছচিএন–আইএমৰ লেফটেনেণ্ট জেনেৰেল (অৱসৰপ্রাপ্ত) সামূহিক নেতৃত্বৰ সদস্য আটেম ডিচি আৰু সেনাপ্রধান লেফটেনেণ্ট জেনেৰেল এণ্টনী নিং খান শিমৰেসহ এনএছচিএনৰ মুখ্য কার্যালয়ত উপস্থিত হ’ল মুইভা৷ পত্নীৰ সৈতে উপস্থিত হোৱা মুইভাক হাজাৰ হাজাৰ জনতাই বিশাল সমদলেৰে আদৰি আনে মুইভাক৷

বীৰৰ দৰে মুইভাক আদৰি অনাৰ লগতে টাংখুল নগাসকলৰ প্রাচীন বীৰসকলৰ পোছাক পিন্ধাই ৰাজকীয়ভাৱে আদৰণি জনায়৷ লক্ষণীয়ভাৱে মুইভাৰ শাৰীৰিক অৱস্থাৰ প্রতি লক্ষ্য ৰাখি এটা চিকিৎসকৰ দলকো সাজু কৰি ৰখা হৈছিল৷ কার্যতঃ মুইভাৰ এই আগমনে এক ঐতিহাসিক দিনৰ সাক্ষী হ’ল উখৰুল জিলা৷ অহা এসপ্তাহ নিজৰ জন্মভূমি গাঁও সোমদলত কটোৱাৰ লগতে কেইবাখনো ৰাজহুৱা সভাত মুইভাই অংশ ল’ব বুলি জানিব পৰা গৈছে৷

নিয়মীয়া বাৰ্তা ডেস্ক, ২৩ অক্টোবৰ