নিয়মীয়া বাৰ্তা, ১৫ মেঃ পাকিস্তানৰ পৰা পঠিওৱা তথ্যৰ ভিত্তিত ২০১৯ চনত আই পি এলত বেটিং কৰা হৈছিল৷ এই চাঞ্চল্যকৰ তথ্য পোহৰলৈ অহাৰ পিছতে এইবাৰ কেলেংকাৰিৰ তদন্তৰ ভাৰ গ্রহণ কৰিছে চি বি আয়ে৷ দিল্লী, যোধপুৰ, জয়পুৰ আৰু হায়দৰাবাদৰ বহু ব্যক্তিৰ ওপৰত সন্দেহ প্রকাশ কৰিছে সংস্থাটোৱে৷ এই সন্দর্ভত সংস্থাটোৱে আজি তিনিজন ব্যক্তিক গ্রেপ্তাৰ কৰিছে৷ বেটিং চক্রৰ সৈতে জড়িত এই তিনিজন বুকীৰ ভিতৰত দুজন হায়দৰাবাদৰ আৰু এজন দিল্লীৰ৷ তেওঁলোকে সন্দেহ কৰা অনুসৰি তেওঁলোকে ২০১৯ চনৰ আই পি এলৰ একাধিক মেচ ফিক্সিং কৰিছিল৷ কালি চি বি আয়ে এই সন্দর্ভত দুটা গোচৰ ৰুজু কৰিছে৷ ইয়াৰ ভিতৰত আছে অপৰাধমূলক ষড়যন্ত্র, প্রতাৰণা, ভাৰতীয় দণ্ডবিধি জালিয়াতি আৰু দুর্নীতি প্রতিৰোধ আইন৷ চি বি আইৰ তৰফৰ পৰা কোৱা হৈছে ‘বিশ্বস্ত সূত্রে জনা গৈছে যে যথেষ্টসংখ্যক লোক লগ হৈ এটি জুৱা চক্র চলাই আহিছে৷ আই পি এল সংক্রান্তীয় এই জুৱাত পাকিস্তানৰ পৰা লেনদেনৰ কিছু তথ্য পোৱা গৈছে৷ এই জুৱাত সাধাৰণ মানুহকো জড়িত কৰিব বিচাৰিছিল তেওঁলোকে৷’ ভুল তথ্যৰে বেংক একাউণ্ট খোলা হৈছিল বুলি জানিব পাৰিছে চি বি আয়ে৷ সেই জুৱাত হাৱালাৰ জৰিয়তেও টকাৰ লেনদেন হৈছে৷ পাকিস্তানৰ ৱাকাছ মালিক নামৰ এজন ব্যক্তি এই জুৱাৰ সৈতে জড়িত থকাৰ তথ্য লাভ কৰা চি বি আয়ে তেওঁৰ ফোন নম্বৰো পাইছে৷ সংস্থাটোৰ এফ আই আৰত দিলীপ কুমাৰ, গুৰাম সতীশ আৰু গুৰাম বাসুৰ নাম সন্নিৱিষ্ট কৰা হৈছে৷ এই কেলেংকাৰিত দহ কোটিৰ লেনদেন হোৱা বুলি ধাৰণা কৰিছে চি বি আয়ে৷ উল্লেখ্য যে আই পি এলৰ জুৱা কোনো নতুন ঘটনা নহয়৷ ২০১৩ চনত স্পট ফিক্সিঙত জড়িত থকাৰ অভিযোগত নির্বাসিত হৈছিল ৰাজস্থানৰ তিনি ক্রিকেটাৰ শ্রীশান্ত, অংকিত চাণ্ডিল্য আৰু অংকিত চৌহান৷