নিয়মীয়া বাৰ্তা ডিজিটেল, ১৭ মাৰ্চঃ আজি দিল্লী সুৰা নীতি সম্পৰ্কীয় ধন সৰবৰাহৰ গোচৰত পুনৰ আম আদমি পাৰ্টীৰ মুৰব্বী অৰবিন্দ কেজৰিৱাললৈ জাননী প্ৰেৰণ কৰিছে বলৱৎকাৰী সঞ্চালকালয়ে (ইডি)। ইডিয়ে দিল্লীৰ মুখ্যমন্ত্ৰীলৈ প্ৰেৰণ কৰা এইখন নৱম চমন। তদন্তকাৰী সংস্থাটোৱে প্ৰেৰণ কৰা জাননীত কেজৰিৱালক ২১ মাৰ্চত ইডিৰ কাৰ্যালয়লৈ আহি তদন্তত সহযোগ কৰিবলৈ কোৱা হৈছে। ইয়াৰ পূৰ্বে ইডিয়ে কেজৰিৱাললৈ ৮বাৰ চমন প্ৰেৰণ কৰি সোধা-পোছাৰ বাবে ফোন কৰিছিল। কেজৰিৱালে শেষবাৰৰ বাবে জাননী লাভ কৰিছিল ২৭ ফেব্ৰুৱাৰীত। ইয়াত তেওঁক ৪ মাৰ্চত ইডিৰ কাৰ্যালয়লৈ আহিবলৈ কোৱা হৈছিল। কিন্তু কেজৰিৱালে কয় যে আদালতৰ নিৰ্দেশতহে তেওঁ সংস্থাটোৰ সন্মুখত হাজিৰ হ’ব। এই গোচৰত ইডিয়ে ৰাউজ এভিনিউ আদালতত উপস্থিত হৈছিল, য’ত তেওঁলোকক ১৬ মাৰ্চত আদালতত হাজিৰ হ’বলৈ নিৰ্দেশ দিয়া হৈছিল। একে সময়তে শনিবাৰে (১৬ মাৰ্চ) ৰাউজ এভিনিউ আদালতত কেজৰিৱালৰ বিৰুদ্ধে দাখিল কৰা ইডি অভিযোগ দুটাৰ শুনানি অনুষ্ঠিত হয়। ইডিৰ চমনত দিল্লীৰ মুখ্যমন্ত্ৰী হাজিৰ নোহোৱাৰ সন্দৰ্ভত এই অভিযোগ দাখিল কৰা হৈছে। অভিযোগৰ শুনানি গ্ৰহণ কৰি ৰাউজ এভিনিউ আদালতে কেজৰিৱালক জামিন মঞ্জুৰ কৰে। শুনানিৰ মাজতে জামিন মঞ্জুৰ কৰাৰ সময়তে অতিৰিক্ত মুখ্য মহানগৰ দণ্ডাধীশ দিব্যা মালহোত্ৰাৰ আদালতেও কেজৰিৱালক আদালতৰ কক্ষৰ পৰা ওলাই যাবলৈ অনুমতি দিয়ে। ৰাউজ এভিনিউ আদালতে কয় যে যিহেতু অপৰাধটো জামিনযোগ্য, গতিকে কেজৰিৱালক জামিন দিয়া হৈছে। অভিযোগৰ সৈতে জড়িত নথি-পত্ৰ কেজৰিৱালক গতাই দিবলৈও ইডিক নিৰ্দেশ দিয়া হয়। কটকটীয়া নিৰাপত্তাৰ মাজতে আদালতত হাজিৰ হ’ল দিল্লীৰ মুখ্যমন্ত্ৰী। ইডিয়ে অভিযোগত কয় যে কেজৰিৱালে তদন্তকাৰী সংস্থাটোক সন্মান কৰা নাই। তদন্তত সহযোগ কৰিবলৈ তেওঁক বাৰে বাৰে মাতি অনা হৈছে যদিও তেওঁ হাজিৰ হোৱা নাই। ইডিয়ে কেজৰিৱালৰ বিৰুদ্ধে গোচৰ চলাবলৈ অনুৰোধ কৰিছিল। একে সময়তে ভাৰত ৰাষ্ট্ৰ সমিতিৰ নেতা কে. কবিতাক গ্ৰেপ্তাৰ কৰা হৈছে। শুকুৰবাৰে হায়দৰাবাদৰ পৰা গ্ৰেপ্তাৰ কৰি দিল্লীলৈ অনা হয়। ইডিয়ে তেওঁৰ ঘৰত অভিযান চলায়, তাৰ পিছত তেওঁক গ্ৰেপ্তাৰ কৰা হয়। শনিবাৰে আদালতে তেলেংগানাৰ প্ৰাক্তন মুখ্যমন্ত্ৰী কে চন্দ্ৰশেখৰ ৰাওৰ কন্যা কবিতাক ২৩ মাৰ্চলৈকে ইডিৰ জিম্মালৈ প্ৰেৰণ কৰাৰ নিৰ্দেশ দিয়ে।