বাৰ্তা ব্যুৰো, ২৫ ডিচেম্বৰঃ ‘আমি বৰপেইটা ফেচবুক ফৰাম’ৰ উদ্যোগত ১৮ জানুৱাৰীৰ পৰা পাঁচদিনীয়া বৰ্ণাঢ্য কাৰ্যসুচীৰে অনুষ্ঠিত হবলগা চতুৰ্থ সংখ্যক বৰপেটা গ্ৰন্থ উৎসৱৰ আজি আনুষ্ঠানিকভাৱে লাইখুটা স্থাপন কৰা হয়৷ বৰপেটা বিদ্যাপীঠ উচ্চতৰ মাধ্যমিক বিদ্যালয়ৰ খেল পথাৰত আজি দিনৰ ১১ বজাত উৰুলি, শংখ, ঘণ্টা ধ্বনিৰ মাজেৰে গ্ৰন্থ উৎসৱৰ লাইখুটা স্থাপন কৰে শিক্ষাবিদ, সাহিত্যিক অক্ষয় কুমাৰ মিশ্ৰই ৷ লাইখুটা স্থাপন কৰি মিশ্ৰই কয় যে,বিশ্ব প্ৰকৃতিখন এখন ডাঙৰ গ্ৰন্থ ৷ ইয়াতকৈ ডাঙৰ গ্ৰন্থ আন একো নাই ৷ মানুহ হৈছে ৰসাল গ্ৰন্থ৷ বিশ্ব প্ৰকৃতিক বা মানুহ নামৰ গ্ৰন্থখন অধ্যয়ণ কৰাৰ বাবে এনে গ্ৰন্থমেলাৰ প্ৰয়োজন৷ গ্ৰন্থমেলাৰ যোগেদি মণীষী সকলে চিন্তা চৰ্চ্চা কৰি লেখা কিতাপ সমূহ পঢ়ি আমি দৃষ্টি,দৰ্শন আৰু চেতনা প্ৰেৰণা লাভ কৰিব পাৰোঁ৷ তেওঁ কয় যে,গ্ৰন্থ উৎসৱ অতি দৰকাৰী অনুষ্ঠান৷ ইয়ে নিশ্চয় নৱ প্ৰজন্মৰ শৈক্ষিক চিন্তাচৰ্চ্চাৰ দিশত চেতনা আৰু প্ৰেৰণা যোগাব ৷ বিশ্বত এতিয়া ই বুক আহিলেও গ্ৰন্থমেলাত গৈ কিনক বা নিকিনক, নতুন প্ৰজন্মৰ যুৱক যুৱতীসকলে কিতাপ সমূহ চালেও বহু পৰিমাণে উপকৃত হব৷ গ্ৰন্থমেলাত আনুষংগিকভাৱে হোৱা প্ৰতিযোগিতামূলক অনুষ্ঠান সমূহেও যুৱক যুৱতী সকলক প্ৰতিভা বিকাশৰ সুযোগ দিয়ে৷ তেওঁ কয় যে, বহু কষ্ট,দীৰ্ঘদিনীয়া ত্যাগ আৰু পৰিশ্ৰমৰ ফলত গ্ৰন্থ উৎসৱৰ দৰে বৰপেটাৰ এটা কৰণীয় দিশ ফেচবুক ফৰামে সম্ভৱ কৰি তুলিছে৷ তাৰ বাবে তেওঁলোক ধন্যবাদৰ পাত্ৰ বুলিও তেওঁ উল্লেখ কৰে৷ বৰপেটা ছোৱালী মহাবিদ্যালয়ৰ অধ্যক্ষ ডঃ বিৰিঞ্চি কুমাৰ দাসে আতঁ ধৰা অনুষ্ঠানটোত আমি বৰপেইটা ফেচবুক ফৰামৰ সদস্য সকলৰ সৈতে বহু গুণী জ্ঞানী ব্যক্তিসকল উপস্থিত থাকে ৷ লাইখুটা স্থাপনৰ পূৰ্ব্বে বন্তি প্ৰজ্বলন কৰে চতুৰ্থ সংখ্যক বৰপেটা গ্ৰন্থ উৎসৱৰ সভাপতি কনকেশ্বৰ দেৱশৰ্মাই৷ উদ্যোক্তা সকলে জনোৱা মতে,অহা ১৮ জানুৱাৰীত বিশিষ্ট ঔপন্যাসিক, গল্পকাৰ আৰু প্ৰবন্ধকাৰ ফণীন্দ্ৰ কুমাৰ দেৱ চৌধুৰীয়ে চতুৰ্থ সংখ্যক বৰপেটা গ্ৰন্থ উৎসৱ মুকলি কৰিব৷ ইতিমধ্যে অসমৰ কেবাটাও আগশাৰীৰ প্ৰকাশন প্ৰতিষ্ঠানে গ্ৰন্থ উৎসৱত অংশ লোৱাৰ কথা সদৰি কৰিছে৷ এইবাৰৰ গ্ৰন্থমেলাত বিভিন্ন প্ৰতিযোগিতাৰো আয়োজন কৰা হৈছে বুলি উদ্যোক্তা সকলে জানিবলৈ দিছে৷
প্ৰেৰক নৱজিত বায়ন