বংগত ঘৰ এৰি পলায়ন শ শ সন্দেহজনক লোকৰ, চলিছে SIR-ৰ কাম

স্বচ্ছ আৰু নিকা ভোটাৰ তালিকা প্রস্তুত কৰাৰ লক্ষ্যৰে নির্বাচন আয়োগে বিহাৰৰ পিছত পশ্চিমবংগকে ধৰি কেইবাখনো ৰাজ্যত বিশেষ ব্যাপক পুনৰীক্ষণ (SIR) ব্যৱস্থা বলৱৎ কৰিছে৷ বিশেষকৈ পশ্চিমবংগত এই ব্যৱস্থা কার্যকৰী হোৱাৰ পিছতে ১০ৰ পৰা ২০ বছৰ পর্যন্ত বাস কৰা একাংশ সন্দেহজনক লোকে ঘৰ এৰি পলায়ন কৰা বুলি তথ্য পোহৰলৈ আহিছে৷

পশ্চিমবংগৰ ডুমডুমৰ চাংপুইপাৰাত ৰাতিটোৰ ভিতৰতে এখন গাঁৱৰ ৭০টাতকৈও অধিক পৰিয়ালে ঘৰ এৰি পলায়ন কৰিছে৷ বুথ পর্যায়ৰ নির্বাচনী বিষয়াসকলে ঘৰে ঘৰে গৈ এছআইআৰ প্রক্রিয়াৰ কথা ঘোষণা কৰে৷হাতত গণনাৰ প্র–পত্র লৈ ঘৰে ঘৰে যোৱা বিএল’সকলে প্রতিটো পৰিয়ালৰ ভোটাৰৰ সঠিক নথি বিচাৰি পুনৰীক্ষণ আৰম্ভ কৰিছে৷

পশ্চিমবংগৰ ডুমডুম অঞ্চলৰ একাংশ লোকে SIRৰ জৰিয়তে ধৰা পৰাৰ ভয়ত ঘৰ এৰি পলায়ন কৰিছে৷ অৱশ্যে এই লোকসকল ক’লৈ গৈছে সেই কথা স্থানীয় লোকসকলে নাযানে বুলি সদৰী কৰিছে৷ চামপুইপাৰা কলনিত বাস কৰা এগৰাকী মহিলাই কয় যে যিসকল লোকে ঘৰ এৰি পলায়ন কৰিছে সেইসকল লোকে ১০ৰ পৰা ২০ বছৰ পর্যন্ত এই অঞ্চলটোত বাস কৰিছিল৷

SIR প্রৱর্তনৰ পিছতে বহু লোকে দেশ এৰি যাব লাগিব বুলি ভয় খাইছিল৷ অৱশ্যে নির্বাচন আয়োগৰ তৰফৰ পৰা সকলোকে নির্ভয় প্রদান কৰিছিল৷ অৱশ্যে যিসকল লোকে ভুৱা নথি–পত্রৰে ভোটাৰ তালিকাত নাম সন্নিৱিষ্ট কৰি ৰাখিছে সেই লোকসকলক বিচাৰি উলিয়াবলৈকে নির্বাচন আয়োগে এছআইআৰৰ প্রৱর্তন কৰে৷

এই SIRৰ জৰিয়তে ভোটদানৰ পৰা বঞ্চিত হৈ থকা বহু যোগ্য ভোটাৰৰ নাম সন্নিৱিষ্ট কৰা হৈছে৷ অহা বছৰ পশ্চিমবংগত বিধানসভা নির্বাচন অনুষ্ঠিত হ’ব৷ ইয়াৰ পূর্বেই স্বচ্ছ আৰু নিকা ভোটাৰ তালিকা প্রস্তুত কৰাৰ লক্ষ্যৰে এছআইআৰৰ প্রৱর্তন কৰা হৈছে৷

বর্তমান নির্বাচন আয়োগৰ তত্ত্বাৱধানত ভোটাৰ তালিকা পৰীক্ষণৰ কাম চলি আছে৷ ইফালে, তৃণমূল চৰকাৰে SIRৰ বাবে বহু লোক আতংকিত হৈ পৰা বুলি অভিযোগ উত্থাপন কৰিছে৷ তেওঁলোকে বহু বৈধ ভোটাৰৰ নাম বাদ পৰিব পাৰে বুলি আশংকা প্রকাশ কৰিছে৷ ইয়াৰ বিপৰীতে ডুমডুমৰ চামপুইপাৰা কলনিৰ বাসিন্দাসকল নিশাৰ ভিতৰতে অন্তর্ধান হোৱা ঘটনাটো ৰহস্যজনক হৈ পৰিছে৷

ডিজিটেল ডেস্ক, ১০ নৱেম্বৰ